बिहार विधानसभाक बजट सत्र शुरू भऽ गेल अछि आ आब जूनियर डॉक्टर्स लोकनिक माँगक लेल आन्दोलन सेहो शुरू भऽ गेल अछि। ई बिहारक सबसँ पैघ अस्पतालसँ शुरू भेल, जतय डॉक्टर काल्हिसँ (शुक्रदिन) अनिश्चितकालीन हड़ताल पर चलि रहल छथि। राज्यक सबसँ पैघ सरकारी अस्पताल पीएमसीएचक पीजी डॉक्टर हड़ताल पर छथि। हड़तालक कारण प्रशासनक खिलाफ जोर-शोर’सँ नारा लगाओल जा रहल अछि, जाहिसँ ओपीडीमे काज बाधित भेल अछि। केवल आपातकालीन सेवा चालू अछि। अस्पताल परिसरमे जमा डॉक्टर प्रशासनक खिलाफ नाराबाजी कयलनि आ हुनकर लंबित वजीफाकेँ तत्काल भुगतानक मांग कयलनि।
वास्तवमे, पीजी डॉक्टर पिछला ४ माससँ स्टाइपेंड (वजीफा) नहि भेटलाक कारण परेशान छथि। पीजी डॉक्टर कुमारी आयशा कहलनि जे कतेको बेर अल्टीमेटम देलाक बादो पीएमसीएच प्रशासन स्टाइपेंड’क मुद्दाकेँ गम्भीरतासँ नहि लेलक, जाहिसँ हुनका लग हड़ताल पर जयबाक अतिरिक्त कोनो विकल्प नहि रहल।
हड़ताल पीएमसीएच परिसरमे अराजकता पैदा कऽ देलक अछि। रोगी आ ओकर रिश्तेदार व्यथित देखाइत छथि, मुदा वर्तमानमे हुनका कोनो सुविधा नहि भेटि रहल अछि।
पीजी डॉक्टरक अनुसार, राजधानी पटनामे रहला पर महत्वपूर्ण खर्च होइत अछि आ कतेको मास धरि स्टाइपेंडक कमीक कारण हुनका लोकनिक लेल विभिन्न समस्या उत्पन्न भेल अछि। एखनि पीजी डॉक्टर लोकनि जाबत धरि अपन माँग पूरा नहि भऽ जायत ताबत धरि काज पर जयबासँ मना कऽ देलनि अछि।
चिकित्सक लोकनि कहलनि अछि जे जाबति धरि लोकक माँग पूरा नहि भऽ जायत ताबत धरि अनिश्चितकालीन हड़ताल जारी रहत।
उल्लेखनीय अछि जे डॉक्टर सभ बहुधा विभिन्न मुद्दाकेँ लऽ कऽ हड़ताल पर चलि जाइत छथि, जाहिसँ रोगीसभकेँ कठिनाई होइत छैक। रोगी आ हुनक परिवारक माँग अछि जे सरकार एहेन समस्याक स्थायी समाधान ताकय, जाहिसँ भविष्यमे हुनका एहेन समस्याक सामना नहि करय पड़य।
