बिहार एसटीएफक टीम राजद विधायक रीतलाल यादवक पटना स्थित आवास पर छापेमारी क’ रहल छल। एहि दौरान 1000 सँ बेसी पुलिसकर्मीकेँ मौका पर तैनाती क’ देल गेल अछि।
बिहारक राजधानी पटनामे आरजेडी विधायक रीतलाल यादवक घर पर एसटीएफक टीम रेड क’ रहल अछि। ई छापेमारी रीतलाल यादवक आवासक संगहि बिहटा आ अभियंता नगरमे स्थित ठिकानासभ पर सेहो जारी अछि। कारी ड्रेस पहिरने एसटीएफक टीम भिन्न-भिन्न ठिकानासभ पर छापेमारी कऽ रहल छल। ताहि लेल कतेको थानाक पुलिसकेँ घटनास्थल पर तैनात क’ देल गेल अछि। जनतब जे 1000 सँ बेसी पुलिसकर्मीक तैनाती क’ देल गेल अछि आ पूरा इलाका केर छावनीमे बदलि देल गेल अछि।
जानकारीक अनुसार, रीतलाल यादव आ हुनक किछु साथी सभक खिलाफ शिकायत दर्ज भेल छल। ओहि केसमे कोर्टक आदेशक बाद ई रेड कएल गेल अछि। राजद विधायक रीतलाल यादव पर पहिनहिसँ मर्डर समेत कतेको संगीन आपराधिक मामिला दर्ज भेल छन्हि। एहि छापेमारीसँ पटना शहर, खासकऽ दानापुर इलाकामे माहौल खराब भ’ सकैत अछि। एकरा ध्यानमे राखि 1000 सँ अधिक पुलिसकर्मीकेँ तैनाती चप्पा-चप्पा पर कएल गेल अछि, ताकि कियो माहौलकेँ खराब करबाक प्रयास नहि क’ सकय।
जनतब जे एहि रेडमे दानापुर एसपी समेत कतेको थानाक पुलिस मौका पर उपस्थिति छथि। हालाँकि एखनि धरि ई स्पष्ट नहि भ’ सकल अछि जे कोन मामिला केर तहत ई कारवाई कएल जा रहल अछि। एएसपी भानुप्रताप सिंह कहलनि जे कुल 11 स्थान पर ई छापेमारी कयल जा रहल अछि आ सम्पूर्ण क्षेत्रकेँ छावनीमे बदलि देल गेल अछि, ताकि कोनो तरहक उत्पात नहि मचय।
विधायक रीतलाल यादव अपन एक्स खाता पर लिखलनि, “चुनावसँ पूर्व लगभग 1000-1500 केर संख्यामे बिहार पुलिस प्रशासन बिना कनो सर्च वारंट आ बिना सूचना केर हमर घर पर छापेमारी कऽ हमर आ हमर परिवारकेँ बिना कारण मानसिक रूपसँ भोरसँ लगातार एखनि तक जाहि तरीकासँ परेशान कएल जा रहल अछि आ पूछय पर किछु बताओल सेहो नहि जा रहल अछि। एहि केर अतिरिक्त महिलाकें बेवजह तंग कएल जा रहल अछि। हमर सामाजिक आ राजनीतिक छविकेँ धूमिल करबाक असफल प्रयास कएल जा रहल अछि। ताहिसँ ई पूर्णतः प्रमाणित होइछ जे उक्त कारवाई राजनीतिक द्वेषपूर्ण भावना आ ओछ मानसिकताक परिचायक अछि।”
