अमेरिका, जर्मनीक बाद संयुक्त राष्ट्र सेहो आबकारी मामिलामे जेलमे बंद दिल्लीक मुख्यमंत्री अरविन्द केजरीवालपर पैघ बयान देलक अछि। संयुक्त राष्ट्र कहलक अछि जे ओकरा आशा अछि जे भारत आ कोनो आन देश जतय चुनाव होइत अछि ओतय लोकक राजनीतिक आ नागरिक अधिकारक रक्षा होय।
दिल्ली शराब नीति घोटाला मामिलामे मुख्यमंत्री अरविन्द केजरीवालक गिरफ्तारीसँ राष्ट्रीय नहिं अपितु अन्तर्राष्ट्रीय घमासान मचल अछि। केजरीवालक मामिलामे जर्मनी आ अमेरिकाक बयान आबि गेल अछि आ आब स्वयं संयुक्त राष्ट्र एहि मामिलामे बयान देलक अछि। संयुक्त राष्ट्र महासचिव एंटोनियो गुटेरेसक प्रवक्ता स्टीफन दुजारिक एकटा मीडिया ब्रीफिंगमे संवाददाता सभकेँ कहलनि, “हम आशा करैत छी जे भारतमे आ कोनो चुनाव करयवला देशमे जे होइत अछि कि राजनीतिक आ नागरिक अधिकार सहित सबहक अधिकारक सुरक्षित रहय आ सभगोटे स्वतन्त्र एवं निष्पक्ष माहौलमे मतदान कऽ सकैथ।”
गौरतलब अछि जे संयुक्त राष्ट्रक ई बयान अमेरिका आ जर्मनी द्वारा कांग्रेसक बैंक खाता जब्त करबा आ दिल्लीक मुख्यमंत्री अरविंद केजरीवालक गिरफ्तारीपर सवाल उठयबाक बयान देलाक बाद आयल अछि। भारतीय विदेश मंत्रालय अमेरिकाकेँ बयान देबाक लेल अमेरिकी राजनयिककेँ सेहो तलब कयने छल, जाहिसँ अमेरिका तिलमिला गेल छल।
ज्ञातव्य जे बुधकेँ अमेरिकी विदेश विभागक अधिकारी अरविंद केजरीवालक गिरफ्तारीक मामिला पर टिप्पणी कयने छल। एहिमे ओ कहने छल जे भारतकेँ पारदर्शी कानूनी प्रक्रियाक अन्तर्गत एहि मामिलामे कारवाई करबाक चाही। भारतीय विदेश मंत्रालय एहि पर कड़ा आपत्ति जतौलक आ कहलक “भारतक कानूनी प्रक्रिया एकटा स्वतंत्र न्यायपालिका पर आधारित अछि जे समय पर परिणाम लेल प्रतिबद्ध अछि। हुनका पर एहि तरहक आरोप लगायब गलत अछि। तखन विदेश मंत्रालय मिशनक कार्यवाहक उप प्रमुख ग्लोरिया बर्बेनाकेँ सम्मन कयलक। मंत्रालय कहने छल “कूटनीतिमे, देशसभसँ अपेक्षा कयल जाइत अछि जे ओ अन्य देशक सम्प्रभुता आ आन्तरिक मामिलाक सम्मान करथि। लोकतांत्रिक देशक मामिलामे ई जिम्मेदारी आओर बढ़ि जाइत अछि।”
अमेरिकासँ पहिने जर्मनी सेहो केजरीवालक गिरफ्तारी पर बयान देने छल। तखन भारत कहलक जे कोनो देशकेँ हमर देशक आन्तरिक मामिलामे हस्तक्षेप करबाक आवश्यकता नहिं अछि। भारत जर्मन राजनयिकसँ सेहो जवाब मँगने छल, जकर बाद जर्मनी बृहस्पतिकेँ एकटा बयान जारी कऽ कहलक जे हमरा भारतक आन्तरिक मामिलासँ कोनो लेना-देना नहि अछि।
ई मामिला २०२१-२२ मे दिल्ली सरकारक शराब नीतिक निर्माण आ कार्यान्वयनमे कथित भ्रष्टाचार आ धनशोधनसँ सम्बन्धित अछि, यद्यपि उपराज्यपालक अस्वीकृतिक बाद एकरा रद्द कऽ देल गेल छल। एही मामिलामे दिल्लीक मुख्यमंत्री अरविन्द केजरीवालकेँ गिरफ्तार कयल गेल अछि आ एहिसँ पहिने लगभग एक साल पहिने दिल्लीक उपमुख्यमंत्री मनीष सिसोदियाक सेहो गिरफ्तारी भेल अछि।
