मधुबनीमे ई घटना पीड़ित परिवार सहित कतेको केर नव वर्षक खुशी शोकमे बदलि देलक। एकटा तेज रफ्तार कार पाँच गोटेकेँ कुचलि देलक। एहि घटनामे पाँच सालक एकटा बालकक मृत्यु भऽ गेल, जखन कि चारि गोटे गम्भीर रूपसँ घायल भऽ गेलाह।
ई दर्दनाक दुर्घटना मधुबनी नगर थाना क्षेत्रक बलुआ मोहल्लाक अछि। एहि घटनासँ आक्रोशित लोक कार चालककेँ पकड़ि लेलक आ खूब पीटलक। लोकक पीटलाक कारण कार चालक सेहो आधमरा भऽ गेल । पुलिस घटनास्थल पर पहुँचल आ ओकर जान बचा लेलक। मुदा, एहिसँ स्थानीय लोकक आक्रोश कम नहि भेल। आक्रोशित लोकसभ सड़क पर आगि लगा कऽ अवरुद्ध कऽ देलक।
जानकारीक अनुसार नव वर्ष मनाबय लेल एक महिला सहित चारि गोटे नेपालक जनकपुर धाम जा रहल छलाह, मुदा हुनक पिकनिकक खुशी सड़क दुर्घटनामे बदलि गेल। बलुआ टोल लग एकटा कार बेकाबू होइत पाँच गोटेकेँ कुचलैत नालीमे पलटि गेल, एहि दुर्घटनामे एकटा पाँच वर्षक बच्चा, जे अपन दादाक सङ्ग चाह आ बिस्कुट लेबाक लेल घरसँ निकलल छल, ओकर दर्दनाक मृत्यु भऽ गेल। मृतक बच्चाक पहिचान बलुआ टोलक मोहम्मद दिलशादक बेटा कोनेनक रूपमे भेल अछि। घटनाक बाद चीख सुनि लोक घटनास्थल पर पहुँचल आ बच्चाकेँ कारक नीचाँसँ बाहर निकाललक। घायलसभकेँ स्थानीय लोकक सहायतासँ तुरन्त अस्पताल लऽ जायल गेल, जतय हुनक स्थिति गम्भीर कहल जा रहल अछि।
घटनाक बाद आक्रोशित परिवारक सदस्य आ स्थानीय लोकसभ बच्चाक शव सड़कपर राखि टायर जरबैत सड़क अवरुद्ध कऽ देलनि। एहि दौरान सड़क पर आगजनीक प्रदर्शन भेल।
घटनाक सूचना भेटैत अधिकारी नगर थाना, रहिका थाना सहित पैघ संख्यामे पुलिस बलक संग घटनास्थल पर पहुँचि गेलाह। एफएसएलक टीम सेहो घटनास्थल पर पहुँचल आ जाँच कयलक। पुलिस मृतकक परिवारकेँ पोस्टमार्टम लेल मनाबय के कोशिश कऽ रहल छल। घटनास्थलक लगपासक क्षेत्र पूर्णतः गमगीन छल। मृत बच्चाक परिवारक कानि-कानि कs बहुत खराब स्थिति भऽ गेल छल।
