कटकमे निर्गुंडी लग दुर्घटना भेल जाहिमे सात लोक घायल भेल अछि। जनतब जे एहि ठाम कामाख्या एक्सप्रेस ट्रेनक 11 डिब्बा पटरीसँ उतरि गेल।
कटकमे निर्गुंडी रेलवे स्टेशनक नजदीक ई दुर्घटना भेल अछि। एखन धरि सात यात्रिक घायल होयबाक समाचार अछि। ट्रेन बंगलूरूसँ असमक गुवाहाटी केर कामाख्या स्टेशन जाय रहल छल। घटनाक कारणक एखनि धरि पता नहि चलि सकल अछि। भोर 11.54 बजे मंगुली लग निर्गुंडीमे एसएमवीटी बंगलूरू-कामाख्या एसी एक्सप्रेसक 11 डिब्बा पटरीसँ उतरि गेल। समाचार सम्प्रेषण धरि 1 यात्रिक मृत्युक सूचना भेटल छल।
ओडिशा अग्निशमन सेवाक महानिदेशक सुधांशु सारंगी कहलनि जे सात घायल व्यक्तिकेँ अस्पताल पहुँचा देल गेल अछि। घायल व्यक्तिक संख्या अधिकतम 10 सँ अधिक नहि होएबाक चाही। हुनकर कहब अनुसार एनडीआरएफ आ ओडिशा अग्निशमन सेवाक कर्मी बचाव अभियानमे रेलवे केर मदद कऽ रहल अछि।हेल्पलाइन नंबर जारी कएल गेल अछि। जनतबक अनुसार, हेल्पलाइन 8455885999 आ 8991124238 शुरू कएल गेल अछि। फंसल यात्री सभक गंतव्य तक पठाबऽ लेल आवश्यक व्यवस्था कयल जा रहल छल।
अधिकारीक अनुसार पटरीसँ उतरबाक कारण तीन ट्रेनक मार्ग परिवर्तित कएल गेल अछि। ई ट्रेन अछि धौली एक्सप्रेस, नीलांचल एक्सप्रेस आ पुरुलिया एक्सप्रेस। ईस्ट कोस्ट रेलवेक सीपीआरओ अशोक कुमार मिश्रा कहलनि, ‘हमरा 12551 कामाख्या सुपरफास्ट एक्सप्रेसक किछु डिब्बा पटरीसँ उतरबाक सूचना भेटल अछि। एखनि धरि हमरा जानकारी भेटल अछि जे 11 एसी डिब्बा पटरीसँ उतरि गेल अछि। कोनो घायलक सूचना नहि अछि। सभ यात्री सुरक्षित छथि।’
ओ कहलनि जे जतए धरि हमरा सबकेँ जानकारी भेटल अछि, दुर्घटना राहत ट्रेन, आपातकालीन चिकित्सा उपकरण पठाओल गेल अछि। वरिष्ठ अधिकारी जल्दिए घटनास्थल पर पहुँचए वला छथि। डीआरएम खुर्दा रोड, जीएम, ईसीओआर आ आन उच्च स्तरीय अधिकारी घटनास्थल पर पहुँचि गेल छथि। जाँचक बाद हमरा सबकेँ पटरीसँ उतरबाक कारण पता चलत। हमर सभक पहिल प्राथमिकता मार्ग पर प्रतीक्षा करैत ट्रेनकेँ डायवर्ट करब आ यात्रा शुरू करब अछि।
ओडिशा सरकार आ रेलवे संग सम्पर्कमे हादसाक बाद असमक मुख्यमंत्री हिमंत बिस्व सरमा अपन ट्वीट कएलन्हि। ओ एक्स पर लिखलनि, ‘हमारा जनतब भेटल अछि ओडिशामे 12551 कामाख्या एक्सप्रेससँ जुड़ल घटना केर। सीएमओ असम ओडिशा सरकार आ रेलवे संग सम्पर्कमे अछि। हम प्रभावित प्रत्येक व्यक्तिसँ सम्पर्क करब।’
