प्रधानमंत्री मोदी बुधदिन रूसक कजान शहरमे आयोजित ब्रिक्स शिखर सम्मेलनमे भाग लेलनि। एहिसँ पहिने ओ विस्तारित ब्रिक्स सङ्गठनक नेतासभक समूह फोटो सत्रमे भाग लेलनि।
फोटो साझा करैत विदेश मंत्रालयक प्रवक्ता रणधीर जायसवाल कहलनि जे समावेशी आ बहुध्रुवीय दुनियाक लेल एक संग, मजबूत आ एकजुट ब्रिक्स, ब्रिक्स लेल एकटा ऐतिहासिक क्षण अछि। नेता लोकनि १६म ब्रिक्स शिखर सम्मेलनमे विस्तारित ब्रिक्स परिवारक पहिल तस्वीरक लेल पोज देलनि।
१६म ब्रिक्स शिखर सम्मेलनमे संगठनक प्रारम्भिक पाँच सदस्य – ब्राजील, रूस, भारत, चीन आ दक्षिण अफ्रीकाक अतिरिक्त चारिटा नव सदस्य – ईरान, संयुक्त अरब अमीरात, इथियोपिया आ मिस्र शामिल भेल अछि। संगहि सऊदी अरबकेँ सङ्गठनक सदस्यता भेटलाक बादो ओ आधिकारिक रूपसँ एहिमे शामिल नहि भेल अछि।
ब्रिक्स संगठनक विश्व अर्थव्यवस्थामे बहुत महत्वपूर्ण भूमिका छैक कियैक तँ ई दुनियाक जनसंख्यामे लगभग ४३% आ विश्वक सकल घरेलू उत्पादमे ३०% योगदान दैत अछि।
ब्रिक्सक स्थापना २००६ मे भेल छल आ २००९ मे एकर पहिल शिखर सम्मेलन आयोजित कयल गेल छल। एकर स्थापनाक समय एकर नाम ब्रिक राखल गेल छल आ एहिमे चारि देश – ब्राजील, रूस, भारत आ चीन शामिल छल। दक्षिण अफ्रीका २०१० मे एहि समूहमे शामिल भऽ गेल आ एहि समूहक नाम ब्रिकसँ ब्रिक्स भऽ गेल। दक्षिण अफ्रीका पहिल बेर २०११ मे अपन शिखर सम्मेलनमे भाग लेलक।
