केंद्र सरकार बिहारमे परमाणु ऊर्जा संयंत्रक स्थापनाकेँ मंजूरी दऽ देलक अछि। केंद्रीय ऊर्जा मंत्री मनोहर लाल खट्टर पटनामे पूर्वी क्षेत्रीय बैसारक बाद एहि बातक घोषणा कयलथि।
काल्हि केंद्रीय ऊर्जा मंत्री मनोहर लाल खट्टर पटनामे एहि गपक घोषणा कयलथि। पूर्वी क्षेत्रक पाँचम क्षेत्रीय बैसारक बाद ओ ई घोषणा कयलनि। ओ कहलनि, देश भरिमे 6 टा छोट-छोट परमाणु रिएक्टर लगेबाक योजना अछि। जाहिमे सँ एकटा बिहारमे लगाओल जाएत। केंद्रीय ऊर्जा मंत्री कहलनि, हर राज्यमे एकटा यूनिट परमाणु ऊर्जा संयंत्र लगेबाक प्रस्ताव आयल अछि।
ओ कहलनि जे वर्तमानमे देशमे बिजली अधिशेषक स्थिति अछि। भारत आब कतेको देशमे बिजली आपूर्ति सेहो कय रहल अछि। अगिला किछु मास लेल बिहारकेँ 500 मेगावाटक अतिरिक्त बिजली उपलब्ध कराओल जाएत। बिहार 1000 मेगावाट बिजली भंडारणक मांग कयलक अछि। जकरा हम मंजूर कय देने छी। बिहारमे 80 लाख स्मार्ट मीटर लगाओल गेल अछि आ बिहार बिजलीमे नीक काज कयलक अछि। मनोहर लाल खट्टर कहलनि जे भारतक वर्तमान बिजलीक जरूरत 242 मेगावाट अछि आ इ आवश्यकता सफलतापूर्वक पूरा भऽ रहल अछि।
एहि बैसारमे पूर्वोत्तर, पूर्वी आ किछु मध्य भारतीय राज्यक ऊर्जा मंत्री आ अधिकारी भाग लेलनि। एहि बैसारक उद्देश्य ऊर्जा क्षेत्रमे राज्यक बीच समन्वय बढेनाइ, तकनीकी आ नीतिगत मुद्दा पर चर्चा आ बिजली प्रणालीक अधिक कुशल आ सुरक्षित बनाबय लेल छल।
