आब बंद होएत बिहारमे जाली नोटक जाल : नीतीश सरकारक विशेष आदेश
पटना । समदिया
भारत-नेपाल सीमा लगक बैंक शाखामे ‘नोट सॉर्टिंग’ मशीन अनिवार्य रूपसँ लगेबाक निर्देश देल गेल अछि। ई एकटा अत्याधुनिक उपकरण अछि।
बिहारमे जाली नोटक धंधा पर रोक लगेबाक दिसामे नीतीश सरकार एकटा पैघ डेग उठौलक अछि। मुख्य सचिव प्रत्यय अमृत बुध (08 अप्रैल, 2026) केँ राज्यमे गैरकानूनी वित्तीय गतिविधि आ जाली मुद्रा पर रोक लगेबाक लेल भारत-नेपाल सीमा लगक बैंक शाखामे ‘नोट सॉर्टिंग’ मशीन अनिवार्य रूपसँ लगेबाक निर्देश देलनि। ओ सीमावर्ती क्षेत्रमे निगरानी बढ़ेबाक आ आम जनताकेँ सुविधा लेल अधिकसँ अधिक मुद्रा विनिमय केंद्र स्थापित करबाक लेल सेहो कहलनि।
‘नोट सॉर्टिंग मशीन’ एकटा अत्याधुनिक उपकरण अछि, जे नोट सभक मात्र गिनती नहि करैत अछि, बल्कि ओकर गुणवत्ता आ प्रमाणिकता केर सेहो जांच करैत अछि। मुख्य सचिव 40म राज्य स्तरीय समन्वय समिति (एसएलसीसी) केर बैठक केर अध्यक्षता करैत अनियमित जमा योजना प्रतिबंध (बीयूडीएस) अधिनियम, 2019 आ बिहार जमाकर्ता सभक हितक संरक्षण (बीपीआईडी) अधिनियम, 2022 केर कार्यान्वयनक समीक्षा कयलनि।
ओ आर्थिक अपराध इकाई (ईओयू) केर दोषी संस्थान सभक विरुद्ध त्वरित कारवाई करबाक निर्देशा देलनि।
प्रतय अमृत सभ सहभागी संस्थान सभकेँ बेहतर समन्वय आ सूचना साझा करबाक पर जोर दैत कहलनि जे एहिसँ जनताक जमा राशि सुरक्षित राखल जा सकत।
1600 सँ शुरू होमय वाला नंबरसँ बैंकसभक फोन आब आओत
दोसर दिसि भारतीय रिजर्व बैंकक क्षेत्रीय निदेशक सुजीत कुमार अरविंद कहलनि जे आब बैंक द्वारा कएल जाएवाला वास्तविक फोन ‘1600’ सँ शुरू होमय वाला नंबर सभसँ आओत। हुनका द्वारा ई सेहो स्पष्ट कयल गेल जे बैंकसभक आधिकारिक वेबसाइटक लिंक केर अंतमे ‘.in’ होयब अनिवार्य अछि, जाहिसँ आम जनता असली आ नकली वेबसाइटमे अंतर बुझि सकत।
बैठकमे कहल गेल जे वित्त विभाग आ आरबीआई द्वारा सोशल मीडिया, रेडियो जिंगल्स (मैथिली आ भोजपुरी) आ समाचार पत्र सभक माध्यमसँ धोखाधड़ीक प्रति निरंतर जागरूकता अभियान चलाओल जा रहल अछि। आरबीआई ‘डिजिटल पेमेंट्स इंटेलिजेंस प्लेटफॉर्म’ केर बारेमे सेहो जानकारी देलक, जे कृत्रिम बुद्धिमत्ताक माध्यमसँ वास्तविक समयमे धोखाधड़ीक पता लगाबय आ संदिग्ध संस्थान सभकेँ चिन्हित करयमे सक्षम अछि। बैसारमे वित्त विभागक अपर मुख्य सचिव आनंद किशोर एवं विशेष सचिव मुकेश कुमार लाल सहित विभिन्न विभाग सभक वरिष्ठ अधिकारी उपस्थित छलथि।
