बिहार सरकार आइ-काल्हि जमीनक सर्वेक्षणक काज तेजीसँ कऽ रहल अछि। एकरा लेल प्रतिदिन नव-नव नियम लागू करबाक संग-संग अधिकारीलोकनिकेँ सेहो आवश्यकताक अनुसार जमीन पर आनल जा रहल अछि। एम्हर सरकार जमीनक संग-संग राज्यमे मौजूद निजी अस्पतालक सर्वेक्षण करबाक आदेश जारी कयलक अछि।
बिहार सरकारक स्वास्थ्य मंत्रालयक एकटा शाखा एकीकृत रोग निगरानी कार्यक्रम (आईडीएसपी) राज्यक सभ निजी अस्पतालक सर्वेक्षण करत। एकरा लेल ई जिम्मेदारी आद्री आ बिल एंड मेलिंडा गेट्स फाउंडेशनकेँ सौंपल गेल अछि। स्वास्थ्य मंत्रालयक अधिकारी लोकनि कहलनि जे एहि सर्वेक्षणक दौरान निजी अस्पतालमे मरीजक लेल उपलब्ध सुविधाक खाका तैयार कयल जायत। एहि अवधिमे निजी अस्पतालसँ बेसीसँ बेसी बीमारीक रिपोर्टिंग सुनिश्चित कयल जायत। अधिकारीसभक कहब छनि जे रोगक रिपोर्टिंगसँ बीमारीक पूर्ण विवरण तैयार करबामे सहायता भेटत।
सर्वेक्षणक दौरान निजी अस्पतालसभकेँ ई बताबय पड़त जे ओतय कोन तरहक सुविधा उपलब्ध अछि। संस्थाक पूरा पता देबय पड़त। निजी अस्पताल सभकेँ ई बताबय पड़त जे कोन तरहक रोगी हुनका लग बेसी आबि रहल छथि। एकर अलावा अस्पताल कतेक दिनसँ चलि रहल अछि एकर जानकारी सेहो देबय पड़त।
सर्वेक्षणक दौरान निजी अस्पतालमे आबयवला मरीजक दैनिक रिपोर्ट तैयार कयल जायत। औसतन कतेक रोगी अस्पताल अबैत छथि एकर विवरण तैयार कयल जायत। निजी अस्पतालसभकेँ पठाओल गेल प्रारूपमे कहल गेल अछि जे एडीआरआई पहिल बेर एतेक पैघ स्तरपर अस्पतालक मानचित्रण कऽ रहल अछि। सभटा अस्पतालकेँ सभटा जानकारी देबाक निर्देश देल गेल अछि।
