बिहारक मुख्यमंत्री नीतीश कुमार कटिहारमे एकटा जनसभामे अपन पुरान मित्र लालू प्रसाद पर प्रहार कयलनि। नीतीश अपन भाषणमे लालू प्रसादक परिवारवादक जिक्र कए रहल छलाह। ओ कहलनि जे जखन ओ स्वयं हटि गेलाह तखन ओ अपन पत्नीकेँ मुख्यमंत्री बनौलनि। तखन दुनू बेटाकेँ अनलनि आ दूटा बेटीकेँ सेहो अनलनि। तखन ओ कहलनि- ‘ओ बहुत पैदा कऽ देने छलाह, की केकरो एतेक बाल-बच्चा पैदा करए केर चाही ? फेर दू टा बेटा आ दू टा बेटीकेँ चुनावमे लगा देलनि।
नीतीश कुमार शनिदिन कटिहारक डडखोड़ा प्रखंडक डुमरियामे एनडीए उम्मीदवार दुलालचंद गोस्वामीक समर्थनमे एकटा जनसभाकेँ सम्बोधित कऽ रहल छलाह। अपन भाषणमे ओ इशारामे नेता प्रतिपक्ष तेजस्वी यादवकेँ भयंकर निशाना बनओलनि। नीतीश कुमार कहलनि – बिहारमे पहिने जंगलराज छल। फेर जखनि हम अयलौंह तऽ हमर नेतृत्वमे विकास भेल।शिक्षा होय वा सड़क, अस्पताल होय वा आवास, सब क्षेत्रमे विकास भेल अछि।
नीतीश कुमार लालू-राबड़ीक १५ सालक शासनक तुलना जंगलराजसँ कयलनि। ओ लालू-राबड़ी शासनकेँ जंगलराज कहलनि। नीतीश कुमार कहलनि जे ओ अपन बेटा आ बेटीकेँ टिकट दैत छथि। ओ आरजेडी पर मुसलमानक संग विश्वासघात करबाक आरोप लगओलनि। नीतीश कुमार कहलनि जे हम समाजक प्रत्येक वर्गक विकास लेल काज कयलौंह।