बिहारक मुख्यमंत्री नीतीश कुमार बुधकेँ प्रधानमंत्री नरेंद्र मोदीक उपस्थितिमे एक बेर फेर भरोसा देलनि जे ओ भाजपाकेँ छोड़ि कय राजद संग नहि जायताह। ओ मधुबनीक झंझारपुरमे पंचायती राज दिवस पर आयोजित कार्यक्रमकेँ संबोधित करैत कहलनि जे हुनकर पार्टी जनता दल (यूनाइटेड) 2005 मे राजदक खिलाफे लड़ल छल आ आगू सेहो मजबूतीसँ लड़ैत रहत।
पंचायती राज दिवस पर आयोजित एहि कार्यक्रममे पीएम मोदी 13,480 करोड़ रुपयासँ अधिक केर कतेको विकास परियोजनाक उद्घाटन आ शिलान्यास कयलनि। ओ कतेको रेल परियोजनाक सेहो सौगात बिहारवासीकेँ प्रदान कयलनि।
एहि अवसर पर आयोजित रैलीकेँ संबोधित करैत बिहारक मुख्यमंत्री नीतीश कुमार फेर कहलनि जे बीचमे गड़बड़ी भ’ गेल छल, मुदा आब कखनो महागठबंधनमे वा राष्ट्रीय जनता दलक प्रमुख लालू यादव आ कांग्रेसक टीम संग नहि जायब।
ओ कहला, “हमर पार्टीक लोक बीचमे गड़बड़ कय देलनि। आब हम कखनो हुनका (महागठबंधनक) संग नहि जा सकैत छी, कारण सभ बहुत गड़बड़ कयने अछि।”
पहलगाममे पर्यटक पर भेल आतंकी हमला पर दुख प्रकट करैत नीतीश कुमार कहलनि जे दु दिन पहिले जम्मू-कश्मीरक पहलगाममे भेल आतंकवादी हमलामे कतेको लोकक हत्या भेल। ई घटना बहुत दुखद आ निंदनीय अछि। ओ शोकाकुल परिवारक प्रति संवेदना व्यक्त करैत कहलनि जे पूरा देश आतंकक खिलाफ एकजुट अछि।
मुख्यमंत्री आगा कहलनि जे जखनि बिहारमे राजद आ हुनकर सहयोगीक सरकार छल तँ जनताक भलाई खातिर ओ लोग किछु नहि कएलक। 2005 केर नवंबर-दिसंबरमे एनडीए केर सरकार बनल। पहिने पंचायतमे बहुत बुरा हाल छल। ककरो काज नहि होइत छल। सरकार बनल तँ 2006 मे हम पंचायती राज आ 2007 मे नगर निकायक कानूनमे संशोधन कयलौंह।
ओ कहलनि, “हम ग्राम पंचायत आ नगर निकायक चुनावमे महिलाक लेल 50 प्रतिशत आरक्षण केर व्यवस्था कयलौंह। ई लोकनि कखनहुँ कोनो महिला लेल किछु कएलक अछि ? आब देखू महिलाकें लेल कतेक काज भऽ रहल अछि। एखनि धरि हम सभ जे-जे कयलौं, ओकर बादमे पंचायती आ नगर निकाय केर चारि चुनाव भऽ चुकल अछि।” मुख्यमंत्री कहलनि जे बिहारक सभ पंचायतमे पंचायत भवनक निर्माण कराओल जा रहल अछि। 16 हजारसँ बेसी पंचायत भवन बनि चुकल अछि, शेषक काम चलि रहल अछि। एही साल चुनावसँ पहिने ई सभ काज होएत।
