बिहार चुनाव प्रचारक लेल सीएम नीतीश कुमारक हाईटेक ‘निश्चय रथ’ केर शुभारंभ भेल। मुख्यमंत्री हरियाणासँ आनल गेल एहि रथक माध्यमसँ अपन सात निश्चय योजनाक उपलब्धिक प्रचार करताह।
बिहारमे आगामी विधानसभा चुनावक बीच मुख्यमंत्री नीतीश कुमार चुनाव प्रचारक लेल अपन विशेष आओर अत्याधुनिक प्रचार वाहन ‘निश्चय रथ’केँ उद्घाटन कयलनि। ई हाईटेक रथ हरियाणासँ आयल अछि आ नीतीश कुमार केर रोड शो आ जनसंपर्क अभियान लेल विशेष रूपसँ तैयार कयल गेल अछि। ‘सात निश्चय योजनाक उपलब्धिकेँ एहि रथक माध्यमसँ जनता तक पहुंचेबाक प्रयास कयल जायत।
‘निश्चय रथ’ लग्जरी वैनिटी वैन जकाँ लगैत अछि, मुदा चुनाव प्रचारकेँ जरूरतक ध्यानमे राखि एहिमे बहुत रास तकनीकी आ सुविधाजनक बदलाव कयल गेल अछि। एहिमे एडजस्टेबल आ आरामदायक सीट अछि ताकि लम्बा यात्राक दौरान थकावट नहि महसूस कयल जाय, एयर कंडीशनर (एसी) आ हीटरक प्रावधान, हाइड्रोलिक सिस्टम लगा देल गेल अछि ताकि मुख्यमंत्री बसक छत धरि पहुँची सकथि, छत पर रेलिंग आ फ्लडलाइट लग देल गेल छै ताकि रातिमे सेहो जनसभा आयोजित कयल जा सकय। निजता लेल विशेष जगह छै ताकि महत्वपूर्ण बैसार आ चर्चाकेँ गुप्त राखल जा सकय। मुख्यमंत्री नीतीश कुमारक तस्वीर, जनता दल यूनाइटेड (जदयू) केँ चुनाव चिन्ह आ ‘बहिन-बेटीक सपना साकार भ’ गेल, धन्यवाद नीतीश कुमार’ सन चुनावी संदेश सेहो रथक बाहरी भाग पर लिखल गेल अछि।
मजेदार बात ई अछि जे रथ पर जदयूक प्रतीक आ प्रचार सामग्री प्रमुखतासँ नजरि आबी रहल अछि, जखनकि सहयोगी भाजपाक एहीमे कोनो जगह नहि देल गेल अछि। एहीसँ इहो संकेत मानल जा रहल अछि जे एहि बेर जदयू अपन जन आधारक संबंधमे पूर्ण रूपसँ स्वतंत्र रणनीति पर काज कय रहल अछि।
