चुनाव रणनीतिकार प्रशांत किशोर राजद नेता आ पूर्व उपमुख्यमंत्री तेजस्वी यादव द्वारा अपनाकेँ भाजपाक एजेंट बताबय पर पलटवार कयलथि। ओ कहलनि जे ओ लालू यादवक बेटा छथि, तेँ सभ जनैत छनि। हुनक बेटा छथि, तेँ राजदक नेता सेहो छथि।
प्रख्यात चुनावी रणनीतिकार आ जनसूरज सूत्रधार प्रशांत किशोर कहलनि, “तेजस्वी यादवक पहचान की अछि, ओ नौवीं फेल छथि। क्रिकेट खेलय गेलाह तऽ ओतय पानि ढ़ोइत छलाह। ओ लालू यादवक बेटा छथि, तेँ सभ जनैत छनि। ओ लालूक बेटा छथि, तें राजद नेता सेहो छथि।”
ओ कहलनि जे एहि लोक सभकेँ एहि सभ बातक की मतलब अछि, मात्र ऊलूल-जलूल बकवास करैत अछि, लोककेँ जाति-धर्ममे बाँटलक, पाइ, शराब, बालुक काज कयलक, पाइ वसूलि टिकट बाँटलक, जातिक नाम पर लोक गरीबीमे, मजबूरीमे वोट दऽ दैत अछि। ओकर बाद ओ सभ नेता बनि ज्ञान दऽ रहल छथि।
प्रशांत किशोर सलाह देलनि जे समाजक दबल-कुचलल वर्ग, जकरा ओ आवाज देबाक दावा करैत छथि, अहाँ हुनका मौका दियौक। एहिसँ पहिने प्रशांत किशोर दावा कयने छलाह जे भाजपाक प्रदर्शन पछिला चुनावसँ नीक रहत।
प्रशांत किशोरक टिप्पणी पर प्रतिक्रिया दैत तेजस्वी यादव बृहस्पतिकेँ कहलनि कि ओ भाजपाक एजेंट छथि। ई बात अहांसभ जरूर सुनने होयब। आब जखन भाजपा हारय वाला अछि तखन भाजपा हुनकासँ बजेनाय शुरू कयलक अछि। माहौल बनायब शुरू कयलक अछि।
तेजस्वी आगू कहने छलथि “प्रशांत किशोर जीकेँ हमर काका नीतीश कुमार कहने छलथि जे हम हुनका राष्ट्रीय उपाध्यक्ष अमित शाहकेँ कहला पर बनेने छलौंह। आइ धरि ने तऽ अमित शाह आ ने प्रशांत किशोर एकर खण्डन कयने छथि। हमरा लग एखनहु ओ वीडियो अछि। ओ सभ शुरूसँ भाजपाक लेल काज करैत आबि रहल छथि।”
