अमेरिकी रिपब्लिकन नेता आ संयुक्त राष्ट्रमे अमेरिकाक पूर्व राजदूत निक्की हेली पछिला साल ७ अक्टूबरकेँ दक्षिणी इजरायलमे हमास हमलाक लेल ईरान, चीन आ रूसकेँ दोषी ठहरौलनि अछि। एहि हमलामे १२०० लोकक मृत्यु भऽ गेल छल आ २५० लोककेँ बन्धक बना लेल गेल छल।
इजरायलक यात्रापर आयल निक्की हेली सोमदिन एकटा वक्तव्यमे कहलनि जे ईरान रूसी खुफिया सूचनाक आधारपर हमलाक योजना बनौलक। चीन पूरा ऑपरेशन के आर्थिक मददि कयलक।
निक्की हेली कहलनि, “ओ सभ हत्यारा आ सहयोगी छथि। एहन घटनाकेँ फेरसँ होबयसँ रोकय लेल हमरासभकेँ स्वयं केर प्रति ईमानदार रहय पड़त।”
ओ इहो कहलनि, “जँ अमेरिका आत्मसंतुष्ट आ अहंकारी भऽ जायत तऽ ओतय सेहो वैह होयत।”
मुदा, निक्की हेली एहि घटनामे चीन आ रूसक संलिप्तताक कोनो प्रमाण नहिं देखौलनि।
रूसक राष्ट्रपति व्लादिमीर पुतिन पछिला साल ७ अक्टूबरक हमलाक बाद मास्कोमे हमास नेतासभक मेजबानी कयने छलथि। रूसक उप विदेश मंत्री मिखाइल बोगदानोव ईरानक उप विदेश मंत्री अली बघेरी कानीक सङ्ग हमास नेता मूसा अबू मरज़ौक, हमासक अंतर्राष्ट्रीय सम्बन्ध कार्यालयक प्रमुख आ हमासक पूर्व स्वास्थ्य मंत्री बसेम नईमसँ रुसमे भेंट कयने छलथि।
रिपब्लिकन नेता निक्की हेली दक्षिणी इजरायलक दौरा कयलनि। ओ सेडेरोट पुलिस स्टेशनक सेहो दौरा कयलनि, जे ७ अक्टूबरकेँ हमासक हमलामे नष्ट भऽ गेल छल।
