अगिला शताब्दीमे सेहो भारत दुनियाक सबसँ बेसी जनसंख्यावला देश बनल रहत। २०६०क दशकक मध्यमे भारतक जनसंख्या चरम पर पहुँचबाक आशा अछि, मुदा ओकर बाद धीरे-धीरे गिरावट आबय लागत। एकर बादो भारत अगिला शताब्दी (२१००) मे दुनियाक सबसँ बेसी जनसंख्यावला देश बनल रहत।
संयुक्त राष्ट्र (यूएन)क विश्व जनसंख्या संभावना २०२४क रिपोर्ट जारी करैत वरिष्ठ जनसंख्या मामिलाक अधिकारी क्लेयर मेनोजी कहलनि जे भारत वर्तमानमे जनसंख्याक मामिलामे दुनियाक सबसँ पैघ देश अछि। अनुमान अछि जे ई पूरा शताब्दी धरि एहने रहत।
ओ कहलनि जे २०६०क दशकक लगपास भारतक जनसंख्या चरम पर पहुँचत। तखन इ कने कम होबए लागत। शताब्दीक अन्त धरि भारतक जनसंख्या लगभग १.५ अरब होयबाक अनुमान अछि। एकर बादो भारत दुनियाक सबसँ बेसी जनसंख्यावला देश होयत।
आंकड़ाक अनुसार, भारतक जनसंख्या २०६४ मे वर्तमान १.४५ अरबसँ बढ़ि कऽ १.७ अरब भऽ जायत। एकर बाद २१०० मे भारतक जनसंख्या घटि कऽ १.५ अरब होयबाक अनुमान अछि, जे १२ प्रतिशतक गिरावट होयत।
रिपोर्टक अनुसार, भारत ओहि देशमे शामिल अछि जतय २०५४ धरि २० सँ ६४ वर्षक कामकाजी आयुक आबादी बढ़त।
रिपोर्टमे सुझाव देल गेल अछि जे एहि अवसरक लाभ उठयबाक लेल देशसभकेँ शिक्षा, स्वास्थ्य आ बुनियादी ढाँचामे निवेश करय पड़त। प्रयास करय पड़त जाहिसँ नव रोजगारक सृजन भऽ सकय। अनुमान अछि जे भारतीयक जीबय केर उम्मीद वर्तमान ७२.२४ वर्षसँ बढ़ि कऽ २१०० धरि ८३.३ वर्ष भऽ जायत।
रिपोर्टमे इहो दावा कयल गेल अछि जे पाकिस्तान अगिला ३० वर्षमे दुनियाक तेसर सबसँ बेसी जनसंख्यावला देश बनि जायत। पाकिस्तानक वर्तमान जनसंख्या २०५४ मे २५.१ करोड़सँ बढ़ि कऽ ३८.९ करोड़ भऽ जायत। अर्थात्, पाकिस्तानक जनसंख्या संयुक्त राज्य अमेरिका आ इंडोनेशियाकेँ पार कऽ जायत। तखन भारतक जनसंख्या १.६९ अरब आ चीनक १.२१ अरब होयबाक अनुमान अछि।
आर्थिक विकास लेल संयुक्त राष्ट्रक सहायक महासचिव नवीद हनीफक अनुसार, २०८०क दशकक मध्यमे दुनियाक जनसंख्या चरम पर पहुँचि जायत, जे अगिला ६० वर्षमे वर्तमान ८.२ अरबसँ बढ़ि कऽ लगभग १०.३ अरब भऽ जायत। शताब्दीक अन्त धरि ई घटि कऽ लगभग १०.२ अरब रहि जायत। रिपोर्टक अनुसार वरिष्ठ नागरिकक संख्या बच्चासँ अधिक होएत।
