नवनियुक्त सिपाहीसँ रंगदारी, मेडिकलमे पास आ फेलक नाम पर गेम, सार्जेंट गिरफ्तार

मुंगेर समदिया
*

मेडिकलक नाम पर नवनियुक्त सिपाहीसँ अवैध रंगदारीक आरोपमे मुंगेर जिलामे एकटा सार्जेंटकेँ गिरफ्तार कयल गेल अछि। आरोपी 60 टा सिपाहीसँ प्रति सिपाही 2500 टका वसूली कयने छल। पुलिस सार्जेंटसँ 36 हजार टका बरामद कयलक अछि।

मेडिकल फिटनेसक नाम पर प्रति सिपाही 2500 टका अवैध रूपसँ रंगदारीक मामिलामे कार्यवाही करैत एसपी पुलिस लाइनमे तैनात सार्जेंट सुमित कुमारकेँ तत्काल प्रभावसँ निलंबित कय देलनि अछि। एसपी सैयद इमरान मसूद कहलनि जे, सार्जेंट सुमित कुमारसँ सिपाही सभसँ अवैध तरीकासँ वसूली कएल गेल 36 हजार रुपैया नगद सेहो बरामद कएल गेल अछि।

तत्काल निलंबित कए पुरबसराय थानामे प्राथमिकी दर्ज कयलाक बाद सार्जेंट सुमित कुमारकेँ गिरफ्तार कए न्यायिक हिरासतमे जेल पठा देल गेल अछि। एसपी कहलनि जे, 11 जूनकेँ जिला बलमे शामिल होबय लेल आयल नवनियुक्त सिपाहीसँ अवैध रंगदारीक शिकायत भेटल अछि, मामिलाक जांच आ रिपोर्ट जमा करबाक जिम्मेदारी पुलिस उप अधीक्षककेँ देल गेल अछि। एसपी कहलनि जे, सार्जेंट सुमित कुमारकेँ तत्काल प्रभावसँ निलंबित कय देल गेल अछि आ पुरबसराय थानामे प्राथमिकी दर्ज कय जेल भेज देल गेल अछि।