राजनगर थाना क्षेत्रक रामपट्टी लाल चौक पर वाहन चेकिंग केर दरम्यान एकटा मोटरसाइकिल पर तस्करी कऽ दारू लऽ जयबाक क्रममे एकटा दारू तस्कर धरायल।
जनतबक अनुसार राजनगर थानाक पु अ नि संजय कुमार सिंह द्वारा बीतल राति रामपट्टी चौक पर वाहन जांच कयल जा रहल छल। ओहि क्रममे एकटा मोटरसाइकिल सबार एक बोरा दारू लयकय जा रहल छल। वाहन जांच होइत देखिकय ओ मोटरसाइकिल सवार मोटरसाइकिल घुमाकय भागय लागल। मुदा पुलिस ओकरा खिहारि कय पकड़ि लेलक।
पुलिस द्वारा पकड़ल गेल मोटरसाइकिल पर उजरा बोरामे 120 बोतल नेपाली गौरव सोफी दारू पाओल गेल। ततपश्चात ओहि तस्करसँ नाम पता पूछला पर ओ अपन नाम सन्तोष कुमार महतो, पेसर स्व. रमेश महतो साकिन राजनपुर थाना अंधराठाढ़ी बतौलक।पुलिस द्वारा दारूक बोरा आ मोटरसाइकिल रजिस्ट्रेशन नंबर बि आर 32 ए ए 7422 केँ जब्त कऽ पकडायल तस्करकेँ विरूद्ध मोकदमा दर्ज कऽ तस्करकेँ जहल पठा देल गेल।
