नेपाल आ भारतक बीच रक्षा सहयोगकेँ सुदृढ़ करबाक आ सैन्य क्षमताक आदान-प्रदान करबाक उद्देश्यसँ ‘सूर्य किरण’ संयुक्त सैन्य अभ्यासक १८म संस्करण मंगलसँ नेपालक रूपनदेही जिलाक सलझंडीमे शुरू होमय जा रहल अछि। एहि अभ्यासमे भाग लेबाक लेल भारतीय सेनाक एकटा विशेष दल नेपाल पहुँचल अछि।
‘सूर्य किरण’ बटालियन स्तरक अभ्यास जंगल युद्ध, चुनौतीपूर्ण भौगोलिक परिस्थितिमे आतंकवादसँ निबटब, आपदा प्रबंधन, मानवीय सहायता आ संयुक्त राष्ट्र शान्ति अभियानक चार्टरक अन्तर्गत काज करय सन क्षेत्र पर केन्द्रित होयत। एकर अतिरिक्त, आन्तरिक क्षमता निर्माण आ पर्यावरण संरक्षण सेहो एहि अभ्यासक मुख्य विषयमे सम्मिलित अछि।
दू सप्ताह धरि चलयवला एहि अभ्यासमे नेपाली सेनाक श्री जंग बटालियन आ भारतीय सेनाक ११म गोरखा राइफल्स भाग लेताह। प्रशिक्षणक अवधिमे दुनू सेनाक कर्मी आपसी कौशल साझा करत आ एक दोसरक तकनीकी विशेषज्ञतासँ लाभान्वित होयत।
नेपाली सेनाक प्रवक्ता कर्नल गौरव कुमार केसी कहलनि जे ई सैन्य अभ्यास दुनू देशक मैत्रीपूर्ण आ सांस्कृतिक सम्बन्धकेँ मात्र सुदृढ़ नहि करत, बल्कि आपसी विश्वास आ व्यापारिक सहयोगकेँ सेहो बढ़ावा देत। ओ कहलनि जे क्षेत्रीय सुरक्षा सुनिश्चित करबाक लेल आ आपदा प्रबंधनमे संयुक्त प्रयासकेँ बढ़ावा देबाक लेल ई प्रशिक्षण महत्वपूर्ण अछि।
‘सूर्यकिरण’क पछिला संस्करण भारतक पिथौरागढ़मे आयोजित भेल छल। एहि संयुक्त अभ्यासमे एखन धरि नेपाली सेनाक ४,२१५ जवान आ भारतीय सेनाक ४,४४२ जवान भाग लऽ चुकल छथि। नेपाल-भारत संयुक्त सैन्य अभ्यास दुनू देशक बीच सैन्य सम्बन्धकेँ सुदृढ़ करबाक सङ्ग-सङ्ग क्षेत्रीय सुरक्षा आ स्थिरता कायम रखबामे महत्वपूर्ण भूमिका निभाबैत अछि। ई अभ्यास दुनू सेनाक बीच तकनीकी आ रणनीतिक सहयोग बढ़यबाक एकटा महत्वपूर्ण माध्यम अछि।
