तेजस्वी यादव प्रधानमंत्री मोदीक गारंटी पर कटाक्ष करैत कहलनि जे हुनकर गारंटी चाइनीज अछि, जे मात्र चुनाव धरि अछि, तकर बाद ई समाप्त भऽ जायत। ओ कहलनि जे देशमे बेरोजगारी आइ चरम पर अछि। १० सालमे गरीबी हटा नहिं पओलाह, की ५ किलो अनाजसँ गरीबी हँटत ?
*
मुंगेर
*
राजद नेता आ बिहारक पूर्व उपमुख्यमंत्री तेजस्वी यादव बृहस्पति दिन मुंगेरक टेटियाबंबरमे एकटा चुनावी जनसभाकेँ सम्बोधित कयलनि आ प्रधानमंत्री नरेन्द्र मोदी आ एनडीए सरकार पर निशाना साधलनि। ओ कहलनि “बिहारमे १७ सालमे एनडीए सरकार जतेक नौकरी नहिं दऽ सकल ओहिसँ अधिक १७ महीनामे हम नौकरी देलहुं। तेजस्वी यादव विकासशील इंसान पार्टी (वीआईपी) नेता मुकेश सहनीक संग राजद उम्मीदवारक पक्षमे चुनावी सभाकेँ संबोधित करैत कहलनि कि मोदी सरकार १० सालमे टेटिया बंबर, मुंगेर आ बिहारक लेल की कयलक। आइ देशमे बेरोजगारी चरम पर अछि। अहाँ १० सालमे गरीबी नहिं हटा सकलहुं, की ५ किलो अनाजसँ गरीबी दूर होयत ? कांग्रेस सरकारमे सेहो इ भेटैत छल।
तेजस्वी यादव मोदीक गारंटी पर कटाक्ष करैत कहलनि जे हुनकर गारंटी चाइनीज अछि, जे मात्र चुनाव धरि अछि, तकर बाद ई समाप्त भऽ जायत। हम सभ एतय मोदी सरकारक बारेमे बात करय लेल नहिं बल्कि मुद्दा पर गप्प करय आयल छी।
ओतहि तेजस्वी यादव अपन सबसँ पैघ बहिन मीसा भारतीक विवादास्पद टिप्पणीक विषयमे पूछल गेल प्रश्नसँ बचैत देखल गेलाह। ओ कहने छलीह जे जँ केन्द्रमे एनडीए सत्तासँ बाहर भऽ जाइत अछि तँ प्रधानमंत्री नरेन्द्र मोदी “जेलमे” रहताह। सोशल मीडिया पर सामने आयल एकटा वीडियोमे मीसाकेँ एहन टिप्पणी करैत सुनल गेल छल। भारतीक टिप्पणीक बारेमे पूछला पर राजद प्रमुख लालू प्रसादक बेटा व्यंग्यात्मक रूपसँ कहलनि, “हमरा एहि बात पर बात करय के की जरूरत अछि जे कियो आन के बारेमे के की कहलक अछि ? हमरा सभकेँ मुद्दा पर बात करए केर चाही।”
वीआईपी प्रमुख आ बिहारक पूर्व मंत्री मुकेश साहनी एहि चुनावमे मोदी सरकारकेँ उखाड़बाक आह्वान करैत कहलनि जे ई गरीब आ पिछड़ाक नहि बल्कि अमीर लोकक सरकार अछि। आइ बिहार आ देश संकटसँ गुजरि रहल अछि। आइ सरकारी संस्था बेचल जा रहल अछि आ कहल जा रहल अछि जे देश आगू बढ़ि रहल अछि। भाजपा २०१४ मे जनताकेँ गुमराह कए सत्तामे आयल छल, मुदा आब बिहारक जनता एहि जालमे नहिं पड़य वाला अछि। आइ लोक चन्द्रमा पर घर बनेबाक विचार कऽ रहल अछि आ हमर समाजक लोकक धरती पर घर नहिं अछि।
