बिहारक पूर्व उपमुख्यमंत्री आ नेता प्रतिपक्ष तेजस्वी यादव पीएम मोदी पर निशाना साधलनि अछि। ओ दावा कयलनि जे एनडीए सरकार ४ जूनकेँ गिरय जा रहल अछि। तेजस्वी पटनामे संवाददाता सभसँ बातचीत कऽ रहल छलाह।
ओ कहलनि जे प्रधानमंत्री मोदी जनैत छथि जे बिहार आ देशक जनता तानाशाही सरकार हटाबय चाहैत अछि। तेसर चरणक चुनावमे हम बहुत नीक स्थितिमे छी। जे चुनावसँ पहिने किछु आओर सोचलनि ओ अंगुरी चबाबाक काज कऽ रहल छथि। हमरा पूरा विश्वास अछि जे एनडीए सरकार ४ जूनकेँ खसय जा रहल अछि।
लालू यादव पर प्रधानमंत्री मोदीक टिप्पणी पर तेजस्वी यादव कहलनि जे प्रधानमंत्री मोदी लालू यादवक खिलाफ कहिया नहिं बजैत छलथि। पीएम मोदी दिन भरि हमरासभक खिलाफ बजैत रहैत छथि। अहाँ देखैत छी, ओ हमरा दोसर राज्यमे गारि दए रहल छथि। ओ सभ घबरायल छथि, डरि गेल छथि, ओ मात्र झूठ बजैत छथि। आरक्षणक सवाल पर ओ कहलनि जे जातिगत जनगणनाक बाद जे आरक्षण हम बढ़ौलहुँ अछि ओ नवम सूचीमे किएक नहिं शामिल कयल गेल ? प्रधानमंत्री मोदी देशक संविधान आ लोकतंत्रकेँ नष्ट करय चाहैत छथि। प्रधानमंत्रीक बात आ कार्यमे बहुत अन्तर अछि। प्रधानमंत्रीकेँ धर्मशास्त्र सीखए पड़त। धर्मक संग-संग कर्मक बात करू, १० साल तक की कयलौंह, बिहारक लेल की कयलौंह ?
