नालंदामे मंदिर प्रबंधनक लापरवाहीसँ भेल हादसा, थानाध्यक्ष निलंबित

—-नालंदाक शीतला माता मंदिरमे भेल भगदड़मे 9 गोटेक मृत्यु भेल आ कतेको घायल अछि। राष्ट्रपति आ प्रधानमंत्री  शोक जतौलनि। मृतकक आश्रितकेँ 2 लाख रुपया मुआवजाक घोषणा भेल आ दीपनगर थानाध्यक्ष निलंबित।

नालंदा। समदिया

नालंदाक शीतला मंदिर हादसाक बाद डीजीपी जांचमे सुरक्षा व्यवस्था आ प्रबंधनक गंभीर लापरवाही उजागर कयलनि अछि। थानाध्यक्षकेँ सस्पेंड कय देल गेल छथि, जखनि कि मंदिरक खराब संरचना आ बुनियादी सुविधाक कमीकेँ हादसाक पैघ कारण मानल गेल अछि। आब सीसीटीवी फुटेजक आधार पर दोषी पर सख्त कार्यवाहीक तैयारी अछि। नालंदा जिलाक प्रसिद्ध शीतलामाता मंदिरमे भेल दर्दनाक हादसाक बाद बिहारक पुलिस महानिदेशक (डीजीपी) विनय कुमार मौका पर पहुँचि कय हालातक जायजा लेलनि। निरीक्षणक दौरान ओ सुरक्षा व्यवस्थामे गंभीर चूक आ मंदिर प्रबंधनक लापरवाहीकेँ हादसाक मुख्य कारण बतौलनि। एही मामिलामे त्वरित कार्यवाही करैत दीपनगर थाना प्रभारी (एसएचओ) केँ तत्काल प्रभावसँ निलंबित कय देल गेल अछि। डीजीपी स्पष्ट कहलनि कि एतेक पैघ आस्था केंद्र पर भीड़ नियंत्रणक लेल पुलिसक पर्याप्त आ प्रभावी व्यवस्था नहि छल , जे बेहद गंभीर आ अक्षम्य लापरवाही अछि। ओ कहलनि कि एहन जगह पर सुरक्षा प्रबंधनकेँ मजबूत भेनाइ अनिवार्य अछि। बिहारक नालंदा जिलामे मंगलदिन दर्दनाक हादसा भेल। एही हादसामे कतेको श्रद्धालुक मृत्यु भ गेल अछि। बताओल गेल जे मंदिरक आसपास मेला लागल छल। ओहि केर चलते ओतय भारी भीड़ छल। निरीक्षणक दौरान डीजीपी मंदिरक संरचना पर सेहो चिंता जतौलनि। ओ बतौलनि कि मंदिरक सीढ़िमे अत्यधिक ढलान अछि, जाहिसँ भीड़क दबावमे फिसलाहसँ भगदड़क स्थिति बनि सकैत अछि। ओ एही दुर्घटनाकेँ एक अहम कारण मानलनि अछि। डीजीपी मंदिर प्रबंधनक कार्यप्रणाली पर कड़ा प्रहार करैत कहलनि कि हुनक ध्यान श्रद्धालुक सुरक्षाक बजाय केवल दान आ दक्षिणा पर केंद्रित रहल। ओ कहलनि कि ई रवैया बेहद गैर-जिम्मेदाराना अछि आ एकरा बर्दाश्त नहि कयल जायत। डीजीपी न्यास परिषदक अध्यक्ष रणबीर नंदनसँ चर्चाक दौरान कहलनि कि जतय हजारोंक भीड़ जुटैत अछि, ओतय प्राथमिक चिकित्सा केंद्र, पेयजल आ अन्य आवश्यक सुविधाक अभाव बेहद दुर्भाग्यपूर्ण अछि। ओ एकरा तुरंत सुधारबाक निर्देश देलनि। एही मामिलामे एसपी भारत सोनी कहलनि कि स्थिति आब नियंत्रणमे अछि आ एहतियातक तौर पर अतिरिक्त पुलिस बलक तैनाती कयल गेल अछि। मंदिर प्रबंधन दिससँ भीड़ जुटबाक आ सुरक्षाकेँ ल कय कोनो अतिरिक्त बलक मांग नहि कयल गेल छल। ओ लोकसँ शांति बना कय रखबाक अपील कयलनि अछि आ भरोसा देलनि अछि कि पूरा मामिलाक निष्पक्ष जांच कय दोषी पर कड़ा कार्यवाही कयल जायत। डीएम बतौलनि कि घायलक इलाज निजी आ सरकारी अस्पतालमे चलि रहल अछि आ प्रशासनक टीम लगातार हुनक स्थिति पर नजरि बनौने अछि। ओ आश्वासन देलनि कि सभ घायलकेँ बेहतर इलाज मुहैया कराओल जा रहल अछि। घटनाक कारण पर डीएम कुंदन कुमार कहलनि कि मंदिर परिसरमे भगदड़ कोना मचल, एकर जांच सीसीटीवी फुटेज आ स्थानीय लोकक बयानक आधार पर कयल जा रहल अछि। जे दोषी पाओल जायत, ओकरा खिलाफ सख्त कार्यवाही कायल जायत। डीएम कुंदन कुमार 8 लोकक मृत्युक पुष्टि कयलनि, मुदा सिविल सर्जन जेपी सिंह कहलनि जे कुल 9 लोकक मृत्यु भेल अछि। घटना दिन केर लगभग 11:30 बजे भेल से बताओल जा रहल अछि। तकर बादसँ समाचार सम्प्रेषण धरि मंदिर क्षेत्र गमनीन छल। सीएम नीतीश कुमार मृतकक परिजनकेँ छह लाख रुपयाक मुआवजाक घोषणा कयलनि अछि। एकर संग केंद्र सरकार एही भगदड़मे जान गंवाबय लोकक परिजनकेँ दू लाख रुपया आ घायलकेँ 50 हजार रुपयाक आर्थिक सहायताक घोषणा सेहो कयलक अछि। प्रधानमंत्री नरेंद्र मोदी आ राष्ट्रपति द्रौपदी मुर्मू एही घटना पर दुख जतौलनि अछि। प्रधानमंत्री एहीमे जान गंवाबय वला पीड़ितक प्रति संवेदना व्यक्त कयलनि। एकर संग भगदड़मे जान गंवाबय वला लोकक परिजनकेँ 2 लाख रुपया आ घायलकें 50 हजार रुपयाक आर्थिक सहायताक घोषणा कयलनि। जाहि मृतकक पहिचान भ चुकल छल ताहिमे रीता देवी बिहारशरीफ सकुन्त मोहल्लाक, रेखा देवी नूरसराय, अनुष्का देवी रहुई, कांति देवी नवादा, देवंती देवी इस्लामपुर, मालो देवी हिलसा, चिंता देवी रहुई, कांति देवी दीपनगरसँ शामिल छथि।