पूर्व आईपीएस अधिकारी किशोर कुणाल महावीर मन्दिर पटना, महावीर कैंसर अस्पताल पटना आ महावीर वात्सल्य अस्पताल पटनाक स्थापना कयने छलाह। ओ अयोध्या मन्दिर न्यासक संस्थापक सदस्य सेहो छलाह।
बिहारक पूर्व आईपीएस अधिकारी किशोर कुणालक हृदयाघातसँ निधन भऽ गेल अछि। किशोर कुणालकेँ रविकेँ भोरमे हृदयाघात भेल छल। हुनका तत्काल महावीर वात्सल्य अस्पताल लऽ जायल गेलनि, जतय ओ दम तोड़ि देलनि। ओ ७४ वर्षक आयुमे अन्तिम साँस लेलनि। आचार्य किशोर कुणाल भारतीय पुलिस सेवाक सेवानिवृत्त अधिकारी छलाह। ओ बिहार राज्य धार्मिक न्यास बोर्डक अध्यक्ष सेहो रहि चुकल छथि। ओ पटनामे महावीर मन्दिर ट्रस्टक सचिव छलाह आ पटनामे ज्ञान निकेतन नामक विद्यालयक संस्थापक सेहो छलाह। महावीर मन्दिर ट्रस्टक सचिवक रूपमे ओ दुनियाक सबसँ पैघ मन्दिरक निर्माणक बीड़ा उठेने छलाह। बिहारक पूर्वी चम्पारण जिलामे एखनि मन्दिरक निर्माण चलि रहल अछि। ओ महावीर आरोग्य संस्थान, महावीर कैंसर संस्थान आ महावीर नेत्रालयक आधारशिला सेहो रखलनि। ई अस्पताल गरीबक लेल वरदान साबित भेल।
किशोर कुणाल पटनामे महावीर मन्दिर, महावीर कैंसर अस्पताल आ महावीर वात्सल्य अस्पतालक स्थापना कयने छलाह। ओ अयोध्या मन्दिर न्यासक संस्थापक सदस्य सेहो छलाह। किशोर कुणाल भारतीय पुलिस सेवाक एकटा जानल-मानल अधिकारी छलथि। १९७२मे किशोर कुणाल गुजरात कैडरमे भारतीय पुलिस सेवाक अधिकारी बनलाह। हुनकर पहिल पोस्टिंग आनन्दमे पुलिस अधीक्षकक रूपमे छल। १९७८ धरि ओ अहमदाबादक पुलिस उपायुक्त बनि गेल छलाह। किशोर कुणाल १९८३ मे जखनि बिहार अयलाह तखनि पटनाक एसएसपी नियुक्त कयल गेल छलाह। २००१मे किशोर कुणाल स्वेच्छासँ भारतीय पुलिस सेवासँ इस्तीफा दऽ देलनि। सेवानिवृत्तिक बाद ओ बिहार राज्य धार्मिक न्यास बोर्डक अध्यक्षक रूपमे काज कयलनि।
आचार्य किशोर कुणालक जन्म १० अगस्त १९५०केँ एकटा भूमिहार ब्राह्मण परिवारमे भेल छल। हुनकर प्रारम्भिक शिक्षा मुजफ्फरपुरक बरुराज गाममे भेल छल। ओ १९७० मे पटना विश्वविद्यालयसँ इतिहास आ संस्कृतमे स्नातक आ १९८३मे स्नातकोत्तर उपाधि प्राप्त कयलनि। आगू चलि कऽ ओ गुजरात कैडरक आईपीएस अधिकारी बनलाह। ओ पटनाक वरिष्ठ पुलिस अधीक्षक सेहो छलाह। गृह मन्त्रालयमे सेवा कयलाक बाद ओ सेवानिवृत्त भेलाह आ संस्कृत विश्वविद्यालय, दरभंगाक कुलपति सेहो बनलाह। एकर बाद ओ बिहारमे शिक्षा आ स्वास्थ्य व्यवस्थामे सुधार लेल योगदान देलनि। बिहारक उपमुख्यमंत्री सम्राट चौधरी आ विजय कुमार सिन्हा, राज्यसभा सांसद संजय झा सहित कतेको नेता हुनक निधनपर दुख व्यक्त कयलनि।
अपन पुलिस जीवनकालमे आचार्य किशोरकेँ अयोध्या विवाद पर विश्व हिन्दू परिषद आ बाबरी मस्जिद एक्शन कमिटीक बीच मध्यस्थताक लेल विशेष कर्तव्य अधिकारी (अयोध्या)क रूपमे नियुक्त कयल गेल छल। हुनका ई जिम्मेदारी प्रधानमंत्री वीपी सिंह देलनि। बाबरी मस्जिद सुनवाई मामिलामे किशोर कुणालक अयोध्या पुनर्विचार नामक पुस्तकक उल्लेख सर्वोच्च न्यायालयमे कयल गेल छल। पुस्तकमे दावा कयल गेल अछि जे ६ दिसम्बर १९९२ केँ जे विवादित संरचना ध्वस्त कयल गेल छल ओ बाबरी मस्जिद नहि छल। पुस्तकक अनुसार, एहि बातक पर्याप्त प्रमाण अछि जे एतय राम मन्दिर स्थित छल। किशोर कुणाल भगवानमे आस्थाक कारण वीआरएस लऽ लेने छलथि। शानदार करियरक वावजूद ओ अपन नौकरी पूरा नहिं कयलनि आ अपना-आपकेँ सामाजिक काजमे झोंकि देलनि।
