विनाशकारी भूकंपक चपेटमे आयल म्यांमारक मददिक लेल भारत सर्वथा सहायता कऽ रहल अछि। विदेश मंत्री जयशंकर शुक्रकेँ जानकारी देलनि जे 40 टन सहायता सामग्री लए कए दुटा जलपोत पड़ोसी देशक लेल रवाना भऽ गेल।
एस जयशंकर लिखलनि, “ऑपरेशन ब्रह्मा, आईएनएस सतपुड़ा आ आईएनएस सावित्री 40 टन मानवीय सहायता लए यांगून बंदरगाह दिसि बढ़ल।” एकटा अन्य ट्वीटमे ओ जानतब देलनि जे 80 सदस्यीय एनडीआरएफ खोज आ बचाव दल सेहो नेप्यी ताव’क लेल रवाना भेल। ई दल म्यांमारमे बचाव कार्यमे सहायता करत।
एहीसँ पहिने प्रधानमन्त्री नरेंद्र मोदी शनिकेँ म्यांमारक वरिष्ठ जनरल महामहिम मिन आंग ह्लाइंग संग बातचीत कयलनि। ओ कहलनि जे भारत एहि कठिन समयमे म्यांमारक लोकक संग एकजुटतासँ ठाढ़ अछि।
एहिसँ पहिने शनिदिन विदेश मंत्रालयक आधिकारिक प्रवक्ता रणधीर जायसवाल एकटा पोस्टमे कहलनि जे ‘ऑपरेशन ब्रह्मा’ केर हिस्साक रूपमे, भारत शुक्रदिनक भीषण भूकंपसँ प्रभावित म्यांमारक लोकक सहायता लेल पहिने प्रतिक्रियाकर्ताक रूपमे काज कयलक। तंबू, कंबल, स्लीपिंग बैग, भोजनक पैकेट, स्वच्छता किट, जनरेटर आ जरूरी दवाई समेत 15 टन राहत सामग्रीक पहिल खेप यांगून पहुँच गेल अछि।
