अपराध

मठक महंतक मुजफ्फरपुरमे हत्या, ग्रामीण आक्रोशित

मुजफ्फरपुर समदिया
*

अज्ञात अपराधी बिहारक मुजफ्फरपुर जिलाक पनापुर ओपीक अंतर्गत बहादुरपुर मठक महंतक हत्या कय देलक। रविदिन भोरमे पुलिस गंडक नदीक कातसँ हुनकर शव बरामद कयलक अछि।

लाश भेटलाक बाद भारी संख्यामे ग्रामीण जमा भऽ गेलथि आ अपराधीक गिरफ्तारी केर मांग कयलनि। बताओल जा रहल अछि जे महंत रामबाबू सिंह अपन एकटा सेवकक संग बहादुरपुर मठमे रहैत छलाह | काल्हि राति करीब 12 बजे ओ अपन कोठलीमे सुतलाह। रातिमे मठमे असगरे रहथि। परिवारमे हत्याक आशंका अछि।

कहल जा रहल अछि जे महंतक ककरोसँ कोनो विवाद नहि छलनि, तखन हुनक हत्या किएक भेल, जांचक विषय अछि। पुलिसक अनुसार महंतक शव मठसँ करीब तीन किलोमीटर दूर बुढ़ी गंडक नदीक कातमे भेटल अछि। भोरमे बाहर निकलल किछू स्थानीय ग्रामीण नदीक कातमे लाशक पहिचान कय पुलिसकेँ एहि बारेमे जानकारी देलनि।

जनतब भेटैत पनापुर ओपी पुलिस तुरंत मौका पर पहुंचल आ पंचनामा तैयार कयलाक बाद लाश पोस्टमार्टमक लेल पठा देलक। लाश पूर्ण रूपेण थाल-कादोमे डूबल छल। स्थानीय लोक एहि घटनासँ नाराज छथि आ अपराधीकेँ जल्दसँ जल्द गिरफ्तार कय कठोर सजा देबाक मांग कय रहल छथि। एहि विषय पर विभिन्न तरहक चर्चा होइत अछि ।

पुलिसक अनुसार एफएसएल टीम आओर डॉग स्क्वाड केर मौका पर बजाओल गेल अछि। पुलिस एहि मामिलाकेँ सभ कोणसँ जांच कय रहल अछि। हत्याक कारण एखनि धरि पता नहि चलल अछि। हत्याक पाछु जमीनक विवादक चर्चा भ’ रहल अछि। ओना पुलिस एखनि किछु कहबासँ परहेज कय रहल छल। पुलिसक कहब छल जे हत्या कोना भेल से पोस्टमार्टम रिपोर्टक बाद पता चलत। समाचार सम्प्रेषण धरि पोस्टमार्टम रिपोर्ट नहि आयल छल।

Spread the love