दरभंगा जिलाक कुशेश्वरस्थान थाना क्षेत्रक अंतर्गत बहेडा गाममे खाद बीजक व्यवसायीक पीट-पीट कs हत्या कs देल गेल। मृतकक पहिचान मदन यादवक रूपमे कयल गेल अछि। कहल जाइत अछि जे ओ अपन पितियौत भाइक विवाहक तैयारीक सिलसिलामे गाम आयल छलाह।
जनतबक अनुसार मंगलदिन राति करीब 30 सँ 40 लोकक समूह मदन यादवक घर पहुंचल आ घरसँ करीब 500 मीटर दूर घसीटैत लs गेल। ओतय हुनका लाठी डंडासँ बेरहमीसँ मारलक। गंभीर हालतमे परिवार हुनका कुशेश्वरस्थान सीएचसी लs गेल, जतय डॉक्टर प्राथमिक चिकित्साक बाद डीएमसीएच रेफर कs देलक। इलाजक दौरान हुनकर मृत्यु भs गेलनि।
घटनाक सूचना भेटलाक बाद घटनास्थल पर पहुँचल पुलिस मृतकक डाँरसँ देसी पिस्तौल सेहो बरामद कयलक अछि जकर पुष्टि कुशेश्वरस्थान थाना प्रभारी अंकित चौधरी कयने छथि।
पुलिस एहि मामिलामे एकटा आरोपी रामसकल यादवकेँ हिरासतमे लs कs पूछताछ शुरू कs देलक अछि। मृतकक भाई ललित यादव कहलनि जे, मदन यादव अपन परिवारक संग कुशेश्वरस्थान बाजारमे रहैत छलाह आ खाद एवं बीजक दोकान चलाबैत छलाह। हुनका दू टा बेटा आ एकटा बेटी छनि। परिवारक अनुसार मदन मंगलदिन अपन गाम विवाहक तैयारीमे आयल छल। तखनि ओही गामक शिवधारी यादव, भूपी यादव, रामसकल यादव, लालमोहर यादव सहित लगभग 40-50 लोक हुनका पर हमला कयलक। परिजन ओही गामक सुजीत कुमार पर सेहो हत्याक साजिशमे शामिल हेबाक आरोप लगौने अछि।
बताओल जा रहल अछि जे मृतकक पिता लालो यादव आ पैघ भाई हीरा यादव शिक्षक रामश्र्य यादवक हत्याक आरोपमे पहिनेसँ जेलमे अछि। ज्ञातव्य जे जनवरीमे एकटा शिक्षककेँ गोली मारि मारि हत्या कऽ देल गेल छल, जाहिमे हीरा यादवक नाम लाइनरक रूपमे सामने आयल। ओहि मामिलामे पुलिस कतेको आरोपीकेँ गिरफ्तार कs चुकल अछि। कुशेश्वरस्थानक थानाध्यक्ष अंकित चौधरी पोस्टमार्टमक बाद शव परिवारकेँ सौंपल गेल से बतौलनि। पूरा मामिलाक जांच भs रहल अछि आर दोसर आरोपी सभकेँ गिरफ्तार करय लेल छापामारी कएल जा रहल अछि।
