बिहारक पूर्व मंत्री आ विकासशील इन्सान पार्टी (वीआईपी) प्रमुख मुकेश सहनीक पिता जीतन सहनीक हत्याक मामिलामे दू टा संदिग्धकेँ हिरासतमे लऽ पुलिस पूछताछ कऽ रहल अछि। पुलिस मुख्यालयक दावा अछि जे पूरा मामिलाक जल्दिये समाधान भऽ जायत।
अतिरिक्त पुलिस महानिदेशक (मुख्यालय) जितेन्द्र गंगवार कहलनि जे पुलिस एहि मामिलाक वैज्ञानिक जाँच कऽ रहल अछि। एकटा विशेष जांच दल (एसआईटी) केर गठन कएल गेल अछि। लगपासक क्षेत्रक सीसीटीवी फुटेज स्कैन कयल जा रहल अछि।
सीसीटीवी फुटेजक जाँचक बाद दूटा संदिग्धकेँ हिरासतमे लेल गेल अछि आ पूछताछ कयल जा रहल अछि।
ओ दावा कयलनि जे पुलिस अधिकारी अत्यंत संवेदनशीलता आ गम्भीरताक सङ्ग मामिलाक जाँच कऽ रहल छथि। फोरेंसिक आ डॉग स्क्वाडक टीम सेहो घटनास्थल पर पहुँचि रहल अछि। एहि मामिलामे कोनो जानकारी देबाक लेल दरभंगाक वरिष्ठ पुलिस अधिकारीक नम्बर सेहो जारी कयल गेल अछि।
ओ कहलनि जे जाहि घरमे जीतन सहनीक हत्या भेल अछि ओ दू मंजिलक अछि। ई घटना भूतल पर कयल गेल अछि। पुलिस सभ कोणसँ जांच कए रहल अछि। मामिलाक खुलासा जल्दिये सामने आबि जाएत।
बिहारक पूर्व मंत्री मुकेश सहनीक पिता जीतन सहनीक अज्ञात हमलावर द्वारा धारदार हथियारसँ हत्या कऽ देल गेल अछि। आइ (मंगल) भोरे दरभंगाक सुपौल बाजारमे हुनक घरसँ हुनक सड़ल शव बरामद कयल गेल। सूचना भेटलाक बाद पुलिस घटनास्थल पर पहुंचि जांच शुरू कऽ देलक अछि।
