लोकसभा चुनाव २०२४ केर चुनाव अभियानमे तेजी आबि गेल अछि। एम्हर बिहारक राजनीतिक गलियारासँ पैघ समाचार सामने आबि रहल अछि। राष्ट्रीय जनता दलक सङ्ग गठबन्धन करयवाला वीआईपी पार्टीक राष्ट्रीय अध्यक्ष मुकेश सहनी एहि बेर लोकसभा चुनाव नहिं लड़बाक घोषणा कयलनि अछि। मुकेश सहनी आइ पटनामे संवाददाता सभसँ बातचीत करैत कहलनि जे एहि बेर नहिँ तऽ हम स्वयं लोकसभा चुनाव लड़ब आ ने हमर परिवारक कोनो सदस्य लोकसभा चुनाव लड़त।
ओ कहलनि जे पार्टी कार्यकर्ता एहि बेर लोकसभा चुनाव लड़ताह। चुनाव नहिं लड़बाक कारण पर जोर दैत मुकेश सहनी कहलनि जे ओ सभ ४० लोकसभा सीट पर प्रचार करय चाहैत छथि आ एहन स्थितिमे चुनाव लड़ि कऽ व्यस्त रहबाक बदला ओ कार्यकर्ता आ महागठबंधन लेल प्रचार करबाक रणनीति बनौने छथि।
मुकेश सहनीसँ ई पुछल गेल कि राजदक संग गठबंधन कतेक दिन तक चलत, एहि पर सहनी कहलनि जे राजदसँ हुनकर अनुबंध मात्र २०२४ केर लोकसभा चुनाव तक नहिं बल्कि २०२५ केर विधानसभा चुनाव तक सेहो रहत। ओ कहलनि जे महागठबन्धन सरकार २०२४ मे केन्द्र मे आ बिहार विधानसभा मे २०२५ मे सरकार बनायत। ओ कहलनि जे ओ वैचारिक लड़ाई लड़ि रहल छथि आ आगू सेहो लड़ैत रहताह।
मुकेश साहनी कहलनि जे आश्वासन देलाक बादो भाजपा निषादक आरक्षण पर किछु नहिं कयलक। बतबैत चली जे एहि बेर लोकसभा चुनावमे वीआईपी पार्टीकेँ राजद कोटासँ 3 सीट भेटल छल। पार्टी वीआईपी चुनावमे झंझारपुर, गोपालगंज आ मोतिहारीसँ अपन उम्मीदवार ठाढ़ करत। प्रतिदिन जखन तेजस्वी यादव चुनाव प्रचारमे निकलैत छथि तखनि मुकेश सहनी हुनका संग रहैत छथि। आब ई देखब रोचक होयत जे मुकेश सहनी आ तेजस्वी यादवक जोड़ी अंततः लोकसभा चुनावमे महागठबंधन लेल की कऽ पाबैत अछि।