बिहारक राजधानी पटनामे काल्हि सोमकेँ दिनमे अपराधी एकटा परिवार पर ताबड़तोड़ गोली चलेलक। एहि घटनामे माँ आ बेटीक मृत्यु भऽ गेलनि आ पिता घायल भऽ गेलाह। घायलक अस्पतालमे इलाज भऽ रहल अछि।
पुलिस घटनाक जांच शुरू कय देलक अछि। पुलिसक अनुसार ई घटना आलमगंज थाना क्षेत्रक न्यू जफराबाद कॉलोनीमे भेल अछि, जतय अपराधी एकहि परिवारक तीन गोटेकेँ गोली मारि देलक। एहि घटनामे दू गोटेक मौत भऽ चुकल अछि, जखनिकि एक गोटे घायल भऽ गेल अछि।
कहल जा रहल अछि जे अपराधी घरमे घुसि कए अंधाधुंध गोली चलेलक। मृतकक पहिचान महालक्ष्मी देवी आ हुनकर बेटी संथाली कुमारीक रूपमे कयल गेल अछि। महालक्ष्मी देवी एनएमसीएचमे नर्स छलीह आ हालमे रिटायर भऽ गेल छलीह। महालक्ष्मीक पति केर टांगमे गोली लागल अछि।
घटनाक जानकारी भेटलाक बाद पुलिस मौका पर पहुंचल आ पूरा मामिलाक जांच शुरू कय देलक। डॉग स्क्वाड आ एफएसएल टीम केर सेहो मौका पर बजाओल गेल। पुलिस आसपासक इलाकाक सीसीटीवी फुटेजक सेहो जांच कय रहल अछि।
एकटा पुलिस अधिकारी कहलनि, एहि घटनाक पाछुक कारण एखनि धरि पता नहि चलल अछि, फिलहाल पुलिस पूरा मामिलाक जांच कय रहल अछि। मानल जा रहल अछि जे एहि इलाकामे बहुत रास सीसीटीवी कैमरा लागल अछि, जाहि कारणे अपराधीक पहिचान जल्दिये भऽ सकैत अछि।
पुलिस मौकासँ कतेको खोखा बरामद कय चुकल अछि। अपराध कयलाक बाद भागल अपराधीकेँ गिरफ्तार करय लेल छापामारी कयल जा रहल अछि। पुलिसक दावा अछि जे जल्दिये अपराधीकेँ गिरफ्तार कयल जायत।
