विश्व प्रसिद्ध हरिहर क्षेत्र सोनपुर मेलाक तैयारी लगभग पूरा भऽ चुकल अछि। एक मास धरि चलयवला एहि मेलाक उद्घाटन बुधकेँ उपमुख्यमंत्री सम्राट चौधरी आ विजय कुमार सिन्हा द्वारा कयल गेल। बिहारक पर्यटन मंत्री नीतीश मिश्र मंगल दिन कहलनि जे सोनपुर मेलाकेँ भव्य बनेबाक लेल पर्यटन विभाग द्वारा कतेको तैयारी कयल गेल अछि।
ओ कहलनि जे मेला क्षेत्रमे सांस्कृतिक पंडाल आ कला एवं शिल्प गामक निर्माण कयल गेल अछि। मेला क्षेत्रक सांस्कृतिक पंडालमे एकटा अस्थायी पर्यटन सूचना केन्द्रक निर्माण सेहो कयल गेल अछि, जतय पर्यटक मार्गदर्शकक नियुक्ति कयल गेल अछि।उद्घाटन दिवस पर बॉलीवुड पार्श्व गायिका ऐश्वर्या निगम आ दीपाली सहाय केर टीम सांस्कृतिक कार्यक्रम प्रस्तुत कयल।
प्रसिद्ध लोक गायिका मैथिली ठाकुर सेहो १६ नवम्बरकेँ अपन प्रस्तुति देतीह। सम्पूर्ण मेला अवधिमे पर्यटन विभाग, कला-संस्कृति आ युवा विभाग एवं जिला प्रशासन द्वारा प्रतिदिन सांस्कृतिक पंडालमे सांस्कृतिक कार्यक्रम प्रस्तुत कयल जायत।
पर्यटन सचिव लोकेश कुमार सिंह कहलनि जे बिहार राज्य पर्यटन विकास निगम पर्यटक गाममे अत्याधुनिक सुविधावला छओटा स्विस कॉटेजक निर्माण कयलक अछि। एकर संगहि पटनासँ सोनपुर धरि एकटा विशेष टूर पैकेज सेहो उपलब्ध कराओल गेल अछि। स्विस कॉटेजक दर कम राखल गेल अछि, जाहिसँ बेसीसँ बेसी पर्यटक एहिमे रहि सकय आ मेलाक आनन्द उठा सकय। एहि कॉटेजमे फाइव स्टार होटल सन सुविधा देल गेल अछि।
पर्यटकक लेल एकटा पारिवारिक भ्रमण पैकेज (एक राति आ दू दिन) तैयार कयल गेल अछि। एकरा लेल ६ हजार रुपया (दू गोटे आ दूटा बच्चा लेल) देबय पड़त। एकर तहत इटियॉस एसी वाहन उपलब्ध करायल जायत। एकर अतिरिक्त, पर्यटक गाममे पर्यटक गाइड, आवास, नाश्ता, दुपहरक भोजन, रात्रिभोज, जलपान आ पानिक सङ्ग रात्रि ठहरबाक व्यवस्था कयल जायत।
एहि पैकेजमे वाहन पर्यटन निगम कार्यालयसँ दुपहरिया १२ बजे सोनपुर लेल प्रस्थान करत। पहिल दिन हरिहरनाथ मन्दिरमे दर्शन आ पर्यटन गाममे सांस्कृतिक कार्यक्रमक आनन्द लेल जा सकैत अछि। आम पर्यटकक सुविधाकेँ ध्यानमे राखि एक दिवसीय विशेष टूर पैकेज तैयार कयल गेल अछि। इ पैकेज दुपहर १२ बजेसँ साँझ ७ बजे तकक होएत।
