मध्य प्रदेशक मुख्यमंत्रीक रूपमे मोहन यादव लेलनि शपथ
भोपाल
*
मध्य प्रदेशमे नवनिर्वाचित मुख्यमंत्री मोहन यादव आ दूटा उपमुख्यमंत्री जगदीश देवड़ा आ राजेन्द्र शुक्लाकेँ राज्यपाल मंगुभाई पटेल पद आ गोपनीयताक शपथ दिएलनि। एहि कार्यक्रममे प्रधानमंत्री नरेन्द्र मोदी आ भाजपाक अन्य वरिष्ठ नेता उपस्थित छलाह।
शपथ ग्रहण समारोह राजधानीक मोतीलाल नेहरू स्टेडियममे भेल। राज्यपाल पटेल एकटा भव्य समारोहमे मोहन यादवकेँ पदक शपथ दियेलनि। तखन ओ ओहि दस्तावेज पर हस्ताक्षर कयलनि जे शपथक बाद हुनका सौंपल गेल छल। राज्यपाल पटेल आ प्रधानमंत्री मोदी यादवकेँ शपथ ग्रहण करैत बधाई देलनि।
शपथ ग्रहण करैत मुख्यमंत्री यादव मंच पर उपस्थित नेता आ अन्य लोकनिक प्रति आभार व्यक्त कयलनि। जगदीश देवड़ा आ राजेन्द्र शुक्ल उपमुख्यमंत्रीक रूपमे शपथ लेलनि। ई दुनू गोटे शिवराज सरकारमे मंत्री होयबाक सङ्ग-सङ्ग एकटा पैघ दायित्वक निर्वहन कयने छथि। प्रधानमंत्री नरेन्द्र मोदी एहि समारोहमे भाग लेबाक लेल विशेष विमानसँ भोपाल पहुँचलाह। ओकर बाद मोतीलाल नेहरू स्टेडियममे बनाओल गेल हेलीपैड पर हेलीकॉप्टरसँ पहुँचलाह ।
मोहन यादव १९८२ मे माधव विज्ञान महाविद्यालय, उज्जैनक संयुक्त सचिव चुनल गेलाह आ १९८४ मे छात्र सङ्घक अध्यक्ष बनलाह। ओकर बाद ओ १९८४ मे अखिल भारतीय विद्यार्थी परिषदक उज्जैनक नगर मंत्रीक कमान सम्हारलनि आ १९८६ मे विभागाध्यक्ष बनलाह। १९८८मे ओ एबीवीपीक राज्य मंत्री बनलाह आ राष्ट्रीय कार्यक्रम समितिक सदस्य सेहो बनलाह। ओ १९८९-९० मे परिषदक राज्य इकाईक मंत्री बनलाह आ १९९१-९२ मे राष्ट्रीय मंत्री चुनल गेलाह।
यादव १९९३ सँ १९९५ धरि राष्ट्रीय स्वयंसेवक संघक उज्जैन शहरक सिटी ब्लॉक केयरटेकर छलाह आ १९९६ मे ब्लॉक केयरटेकर आ नगर कार्यक जिम्मेदारी सम्हारलनि। ओ १९९७ मे भाजपाक राज्य समितिक सदस्य बनलाह, १९९८ मे ओ पश्चिम रेलवे बोर्डक सलाहकार समितिक सदस्य बनाओल गेलाह। ओ २००४ सँ २०१० धरि उज्जैन विकास प्राधिकरणक अध्यक्ष सेहो छलाह। ओ २०११ सँ २०१३ धरि मध्य प्रदेश राज्य पर्यटन विकास निगमक अध्यक्ष सेहो छलाह। यादव पहिल बेर 2013 मे विधायक बनलाह। पार्टी २०१८ मे फेर हुनका पर भरोसा जतेलनि आओर ओ चुनाव जीतलाह आ २०२३ मे पुनः एक बेर निर्वाचित भेलाह एवं मुख्यमंत्रीक कुर्सी तक पहुँच गेलाह।
