बिहारक उपमुख्यमंत्री तेजस्वी यादव अयोध्या मामिला पर फेर बयान देलनि। बिहारमे एकटा रैलीकेँ सम्बोधित करैत तेजस्वी यादव कहलनि, “जँ अहाँकेँ चोट लागत तँ अहाँ मन्दिर जाएब वा डॉक्टरक लग जाएब।”
अयोध्यामे भव्य राम मन्दिर बनि रहल अछि। २२ जनवरी २०२४ केँ रामललाक प्राण प्रतिष्ठा होयत। एहिसँ पहिने विपक्षी दल द्वारा बहुत रास राजनीति कएल जा रहल अछि। एम्हर तेजस्वी यादव बिहारमे एकटा जनसभाकेँ सम्बोधित कयलनि। उप मुख्यमंत्री तेजस्वी यादव अपन संबोधनमे कहलखिन जे “अगर अहांकेँ चोट लागत तऽ मंदिर जायब आ पंडित जीकेँ देखायब वा डॉक्टरक पास जायब। जँ पेट खाली अछि तखन की अहां मंदिर जाएब ? ओतए अहांकेँ आर उल्टा दाने देबए पड़त। हम कोनो धर्मक विरुद्ध नहिं छी, हम व्यक्तिगत रूपसँ अपन बेटीकेँ मुंडन करेबाक लेल तिरुपति मन्दिर गेलहुँ, जतय हम अपन केश सेहो चढ़ौलहुँ। देशक वर्तमान जे स्थिति अछि, एतय देश, संविधान आ लोकतंत्रकेँ समाप्त करबाक प्रयास कयल जा रहल अछि। हम लोकसभकेँ नौकरी बाँटबाक तैयारी कए रहल छी आ ई लोक सभ ईडी आ सीबीआई केर घुसा दैत छथि।” आगा ओ कहलनि जे हम तऽ बचपनेसँ ईडी आ सीबीआई केर देखि रहल छी।
तेजस्वी यादव अपन सभामे कहलनि जे “हमर लड़ाई नरेन्द्र मोदीसँ नहिं अछि। हम तऽ मुद्दाक लड़ाई लड़ए चाहैत छी। हम सभ बस इ पूछि रहल छी जे अहां कहलहुं जे अहां हर खातामे १५-१५ लाख रुपया देब। ओ १५ लाख कतए गेल ? काला धन एखन धरि किएक नहिं आयल अछि ? अहाँक प्रधानमंत्री बनलाक बाद मेहुल चोकसी, ललित मोदी आ नीरव मोदी देश छोड़ि भागि गेलाह। ई लोक अहांकेँ चकमा दए कए कोना भागि गेल ? ई लोकसभ बैंककेँ लूटि कऽ भागि गेल आ बैंककेँ दिवालिया कऽ देलक। ई ककर पाई छल ? जँ हम ई प्रश्न पूछैत छी तऽ की हम गलत करैत छी ? की भगवा मोदीजी अनलखिन ? भगवा कहियासँ चलि रहल अछि ? भगवा हमर अछि। हुनकर देन थोड़बे अछि। हमर तिरंगामे सेहो भगवा अछि। हरियर सेहो अछि। ई सभ देशकेँ लूटि सकैथ, बस ताहि लेल घृणा पैदा कएल जा रहल अछि।”
पुनः ओ कहलनि “मोदीक बात नहिं, बल्कि मुद्दाक बात करू। मोदी जी सब जगह मात्र भाषण दैत छथि। ओ भाषणक अलावा आउर किछु कयलथि की ? अयोध्यामे जे हजारो-लाख करोड़ रुपया खर्च भ रहल अछि, ताहिसँ कतेक लोककेँ वेतन भेटैतत, लोककेँ शिक्षा आ चिकित्सा सुविधा भेटैत। भगवान रामकेँ की चाही ? हुनका चाही की सभ गोटे खुश, सुखी आ समृद्ध होथि। ओ कहलनि जखन अहांकें नौकरी भेटत, शिक्षाक व्यवस्था होयत, चिकित्साख सुविधा होयत, तखने ने लोक सुखी आ समृद्ध होयत। मोदी जी झूठक कारखाना छथि। मोदी जी झूठक थोक व्यापारी छथि।”
जनतब ई जे राम मंदिरक मुद्दा पर विपक्षी दल लगातार केंद्र सरकार आ भाजपा पर निशाना साधि रहल अछि।
