मिथिलाक संस्कृति पूरा भारतीय संस्कृतिक अनन्य गहना : अमित शाह
*
सीतामढ़ी समदिया
*
केंद्रीय गृहमंत्री अमित शाह शुक्रदिन बिहारक सीतामढ़ी जिलाक पुनौराधाममे जानकी मंदिरक पुनर्विकासक शिलान्यास कयलनि जे देवी सीताक जन्मस्थली अछि।
भूमि पूजन आ 882 करोड़क लागतसँ बनय वला माँ जानकी मंदिरक शिलान्यास काल्हि भेल।
एहि अवसर पर अनेको बेर गृहमंत्री मिथिला शब्दक उद्घोष कयलनि, मिथिला-मिथिलाक शोरसँ गुंजि उठल सीतामढ़ी।
एहि अवसर पर ओ अमृत भारत ट्रेनक वर्चुअली हरियर झंडा सेहो देखौलनि। गृहमंत्री अमित शाह कहलनि जे इ देशक लेल शुभ अवसर अछि।
ओ कहलनि जे, माता जानकीक मंदिर निर्माणक लेल तँ नींव राखल गेल अछि आ एहि क्षेत्रक समग्र विकासक लेल सेहो नींव राखल गेल अछि। आइ हम एहि मंचसँ माता जानकी भगवान श्री रामक करोड़ों भक्तकेँ शुभकामना देबय चाहब। एहि ठाम नीतीश बाबू करोड़ों रुपयासँ पुनौराधाम मंदिरक विकास शुरू कय देने छथि। मुख्यमंत्री नीतीश कुमार सेहो मौजूद छलथि।
गृहमंत्री अमित शाह कहलनि, “ई भक्त लोकनिक लेल हर्षक विषय अछि। हम एतय एकटा बात कहय चाहैत छी। मिथिलाक संस्कृति समस्त भारतक अनुपम संस्कृति थिक। आइ शुभ दिन अछि। रामायण युगमे जखनि राजा जनक अकाल समाप्त करबाक लेल सोनाक हरसँ भूमि जोतैत छलथि तखन माँ सीता प्रकट भेलीह आ वर्षा भेल आ अकाल मेटा गेल।
आइयो वैह संयोग अछि जे माँ जानकीक मंदिरक शिलान्यासक अवसर पर भारी बरखा भेल अछि, ई माँ केर आशीर्वाद अछि। ई सिर्फ मिथिला वा बिहार लेल नहि बल्कि पूरा भारतक लेल शुभ अछि। माँ जानकी मंदिर भव्य मंदिर तँ हेबे करत, मिथिला आ बिहारक सौभाग्यक शुरुआत सेहो अछि।”
सीएम नीतीश कुमारक उपस्थितिमे पुनौराधाम स्थित माँ जानकी मंदिरक भूमि पूजन एवं शिलान्यासक बाद सबसँ पहिने केंद्रीय गृहमंत्री अमित शाह जनसभामे माता जानकीक स्तुतिक नारा लगौलनि। शाह कहलनि जे अहाँ सब हाथ उठा कय कहियो “सियावर रामचंद्र की” जय…..।
अमित शाह कहलनि जे आइ ई गौरवक बात अछि जे सीतामढ़ीमे जे विकास काज ओ मंदिरक शिलान्यास भेल, से मात्र मिथिलेक लेल नहि अपितु भारत आ समस्त विश्वक लेल ई मंदिर आ विकासक काज उदाहरण प्रस्तुत करत। देश भरिमे माता जानकी आ श्री राम केर भक्त लोकनिकेँ शुभकामना दैत छी। माता सीतासँ संबंधित स्थानक विकास होएत। भारतक संस्कृतिमे माता सीताक अद्वितीय स्थान अछि।
ओ कहलनि जे एक जीवनमे आदर्श पत्नी, माँ, बेटी आ राजमाताक सब रूप पूरा कयने छलीह माँ जानकी।
आगू ओ कहलनि, “पीएम बिहारमे रेलवेक विकास लेल काफी काज कयलनि। जखनि लालू रेल मंत्री छलाह तखनि 1131 करोड़ टका खर्च भेल। 2025 मे केंद्र बिहारमे रेलवे लेल 10 हजार 66 करोड़ टका खर्च कयलक अछि।
सीतामढ़ीमे काल्हि अमित शाह कहलनि जे संविधानमे ओहि लोककेँ मतदानक अधिकार नहि देल गेल अछि जकर जन्म भारतमे नहि भेल अछि। घुसपैठियाकेँ वोट देबय केर अधिकार नहिं अछि। ताहि लेल विपक्ष हंगामा मचा रहल अछि। आगामी दिनमे पूर्ण बहुमतसँ बिहारमे एनडीए सरकार बनय जा रहल अछि।
अमित शाह कहलनि जे घुसपैठियाकेँ मतदाता सूचीसँ हटा देल जाए वा नहि। चुनाव आयोगकेँ एसआईआर करबाक चाही वा नहि करबाक चाही। लालू यादव ककरा बचाबय चाहैत छथि ? पहिल मसौदा मतदाता सूचीक बाद राजद आ कांग्रेस कोनो आपत्ति दर्ज नहि कयलक। की एहि लोक सभकेँ घुसपैठियाक वोट चाही ? घुसपैठिया-बंगलादेशी केर बचाबय चाहैत छथि। जे अहाँक रोजगार खा जाइत अछि। वोट बैंकक राजनीति बंद करू। ई पहिल बेर नहिं अछि जे मतदाता सूचीमे संशोधन भऽ रहल अछि।
गृहमंत्री अमित शाह सीतामढ़ीक पुनौरा धाम स्थित माता सीता मंदिरक शिलान्यास कयलनि। एहि दौरान सीएम नीतीश सेहो हुनका संग मौजूद छलाह। 882 करोड़क लागतसँ ई भव्य धाम 11 मासमे तैयार भऽ जाएत।
