‘मिथिलाक पावन भूमि जे सदैवसँ संस्कृति, साधना आओर ज्ञानक भूमि रहल अछि पुन: ऐतिहासिक क्षणक साक्षी बनल’, मैपुप्र समदियाकेँ ई जानकारी दैत राजकुमार झा आगा जनतब देलनि -:
दरभंगा जिलाक ग्राम सझुआरमे स्थापित मातृसदन, दरभंगा शाखा केर दिव्य उद्घाटन १८ अप्रैल, २०२५ तदनुसार शुक्रदिन परमपूज्य गुरुदेव स्वामी शिवानंद जी महाराजक दिव्य उपस्थितिमे वैदिक शास्त्रोक्त विधिनुसार संपन्न भेल। वस्तुत: ई अवसर मिथिलाक आत्मामे नवजागरणक दिव्यतम शुभारंभक प्रतीक अछि। गुरुदेव जीक करूणामय उपस्थितिसँ ई भूमि पुनः तप, सेवा, ज्ञान आओर आत्मबोधक आध्यात्मिक ऊर्जाकें आलोकित करत।
गुरुदेव जीक शुभ आगमन अपन जन्मस्थल सझुआर, दरभंगामे दिनांक १८ अप्रैल, २०२५ कें सायंकाल ५.३० बजे भेलनि। तत्पश्चात नवग्रह पूजन, वास्तुपुरुष पूजन एवम् हवन आदिक आयोजन भेल। एहि ऐतिहासिक अवसर पर विपुल संख्यामे श्रद्धालु भक्तजन उपस्थित भऽ उद्घाटन समारोहक साक्षी बनबाक सौभाग्य प्राप्त कयलनि।
नवनिर्मित आश्रममे किछु दिन धरि गुरुदेवजी प्रवास करताह। प्रवासक अवधिमे श्रद्धालु भक्तजन गुरुदेव जीसँ आशीर्वाद एवं मार्गदर्शन प्राप्त कय जीवनक परम लाभ प्राप्त कऽ सकताह।
