मणिपुरमे शान्ति बहाल करबाक लेल पहिल बेर मेइती, कुकी आ नागा समुदायक सदस्य विधायक भेँट कयलनि। एहि बैसारक उद्देश्य मेइती आ कुकी समुदायक बीच मतभेदकेँ दूर करब आ राज्यमे चलि रहल संघर्षकेँ जल्दीसँ जल्दी समाप्त करब अछि।
लगभग १७ मास पहिने मणिपुरमे भेल जातीय हिंसाक बाद आब राज्यमे शान्ति बहाल करबाक प्रयास तेज कऽ देल गेल अछि। पहिल बेर मेइती, कुकी आ नागा समुदायक विधायकलोकनि मंगलदिन एकटा बैसार कयलनि जकर उद्देश्य मेइती आ कुकी समुदायक बीच मतभेदकेँ दूर करब आ राज्यमे चलि रहल संघर्षकेँ जल्दीसँ जल्दी समाप्त करब छल। बैसारमे मेइती समुदायक प्रतिनिधित्व विधानसभा अध्यक्ष थोकचोम सत्यब्रत सिंह, विधायक थोंगम बसंतकुमार सिंह आ तोंगब्रम रबिन्द्रो कयलनि। कुकी समुदायक तरफसँ लेटपाओ हाओकिप आ नेमचा किपगेन शामिल भेलाह। नागा समुदायक प्रतिनिधित्व विधायक राम मुइवाह, अवांगबो न्यूमाई आ एल. दिखो कयने छलाह।
महत्वपूर्ण बैसारमे गृह मंत्रालयक वा
वार्ताकार ए.के. मिश्रा आ अन्य वरिष्ठ अधिकारी सेहो उपस्थित छलाह। मुदा, गृहमंत्री अमित शाह आ मणिपुरक मुख्यमंत्री एन. बीरेन सिंह बैसारमे शामिल नहि भेलाह।
सूत्रक अनुसार, गृह मंत्रालय सभ सम्बन्धित विधायक आ मंत्रीकेँ पत्र आ टेलीफोन कॉलक माध्यमसँ बैसारमे भाग लेबाक लेल आमंत्रित कयने छल। ई कदम गृह मंत्री अमित शाह द्वारा मणिपुरमे शान्ति स्थापित करबाक लेल मेइतेई आ कुकी समुदायक बीच वार्ताक आवश्यकता होयबाक लगभग एक मास बाद कयल गेल अछि। ओ आश्वासन देने छलाह जे केंद्र सरकार दुनू समूहक संग चर्चा कऽ रहल अछि। एहि वक्तव्यक बाद ई बैसार भेल।
मणिपुरमे पछिला साल मईमे जातीय हिंसा भड़कि गेल छल जखन कुकी समुदाय मेइती समुदायकेँ अनुसूचित जनजातिक दर्जा देबाक विरोधमे राज्यक पहाड़ी क्षेत्रमे आदिवासी एकता मार्च निकाललक। तहियासँ भेल हिंसामे कुकी आ मेइती समुदायक सदस्य आ सुरक्षाकर्मी सहित २२०सँ बेसी लोकक मृत्यु भऽ चुकल अछि। कुकी विधायक लोकनि बैसारमे मणिपुरक आदिवासी लोकक लेल अलग प्रशासन वा केन्द्र शासित प्रदेशक माँग सेहो दोहरओलनि।
हालमे आयोजित विधानसभा सत्रमे भाजपाक सात सहित दस कुकी विधायक भाग नहि लेलनि।
