मजदूरी मांगला पर २ मंजिलासँ देलक धक्का, आदमीक मौकापर मृत्यु

झंझारपुर समदिया
*

झंझारपुर अनुमंडल अस्पताल लग किरायाक मकानमे संचालित फाइनेंस कंपनी (डीजेटी माइक्रो फाइनेंस) केर कार्यालयमे मजदूरी मांगय गेल एकटा महिला रसोइयाक पतिकेँ मैनेजर क्रोधमे दू मंजिला भवनक सीढ़ीसँ धकेल देलक। हुनक मौकापर मृत्यु भऽ गेल। मृतकक पहिचान नगर परिषदक वार्ड ११ मे बेलाराही गामक निवासी काशीराम मण्डलक पुत्र झोटाई मण्डल उर्फ बाउकू मण्डल (४८) केर रूपमे भेल अछि। घटनाक बाद अफरातफरी मचल। पुलिस पहुँचला धरि भीड़ आरोपी प्रबंधक संतोष कुमार यादवकेँ पीटि चुकल छल। संतोष कुमार यादव पूर्वी चम्पारणक घोरासहनक भगवानपुरक निवासी कहल जाइत अछि। हुनका अनुमंडल अस्पतालमे भर्ती कराओल गेल अछि । एहि घटनासँ भीड़ एतेक क्रोधित भऽ गेल जे अनुमंडल अस्पतालमे पुलिस सुरक्षा घेरा बेर-बेर तोड़य चाहैत छल। भर्ती मैनेजरकेँ मारय पर तुलल छल। पुलिस कोनो तरहेँ क्रोधित लोकसभकेँ मनयबामे सफल रहल।

कहल जाइत अछि जे बेलाराहीक झोटई मण्डल आ हुनक पत्नी ललिता देवी उर्फ रीता देवी परिवारक पेट भरबाक लेल घरमे भोजन बनबैत छलाह आ बर्तन साफ करैत छलाह। ललिता देवी उक्त फाइनेंस कंपनीक मैनेजरक भोजन सेहो पकाबैत छलीह। कोनो कारणसँ ओ पाँच-छह दिन धरि नहिं अयलीह, तेँ मैनेजर दोसर श्रमिककेँ नियुक्त कयलक। ओ अतीतमे दू बेर बकाया पैसाक माँग कयने छलीह। शुक्रदिन पति-पत्नी तकादा करबाक लेल एक सङ्ग पहुँचलथि। एहि दौरान जखन बकझक भेल तखन शाखा प्रबंधक एक-दू थप्पड़ झोटाई मंडलकेँ मारलक। आरोप अछि जे जखन ओ मना कऽ देलनि तखन प्रबंधक कहलनि जे जँ अहाँ चुप नहिं रहब तँ नीचा फेकि देब। झोटाई मंडल कहलखिन, “फेंकि कs देखाउ। जहिना ओ ई कहलनि प्रबंधक हुनका गला पकड़ि दू मंजिला सीढ़ीसँ धक्का दऽ देलक। सीढ़ी पर रेलिंग नहिं छल। माथक बल खसि पड़ल झोटाई मण्डलक अत्यधिक रक्तस्रावक कारण मौकापर मृत्यु भऽ गेल। घटनाक समय फाइनेंस कम्पनीक कार्यालयमे कुल सात कर्मचारी उपस्थित छल। पुलिस शाखा प्रबंधक सहित चारि गोटेकेँ गिरफ्तार कयलक अछि। हत्यारोपित मैनेजरकेँ पुलिस हिरासतमे इलाजक लेल एकटा उच्च संस्थानमे लऽ गेल अछि। एसडीपीओ पवन कुमार कहलनि जे एखन धरि चारि गोटे गिरफ्तार कयल जा चुकल अछि, कारवाई कएल जाए रहल अछि।