सोमदिन पश्चिम बंगाल विधानसभामे प्रश्नकालक दौरान सीएम ममता बनर्जी भाजपा पर पैघ आरोप लगबैत कहलनि, भाजपा शासित राज्यमे बंगला भाषी नागरिककेँ निशाना बनाओल जा रहल अछि। हुनका सभ पर बांग्लादेशी कहि कय गलत कार्यवाही भऽ रहल अछि। स्थिति एहेन अछि जे ओहि बंगालीकेँ सेहो अवैध बांग्लादेशी प्रवासी कहल जा रहल अछि जिनका लग वैध दस्तावेज अछि। एकर बाद भाजपा विधायक सब भारी हंगामा मचौलनि।
ममता बनर्जी कहलनि, भाजपाकेँ लाज होयबाक चाही जे ओ असली भारतीय नागरिककेँ सिर्फ ओकर भाषा केर आधार पर बांग्लादेशी कहि रहल अछि। बंगला केर संग-संग गुजराती, मराठी आ हिन्दी बाजयमे गर्व महसूस करबाक चाही। जँ अहाँ हमरा सँ पूछब तऽ हम ई सब भाषा बाजि सकैत छी। एक दिसि भारतीयकेँ बजैत भाषाकेँ कारण बांग्लादेशी कहि रहल छी तऽ दोसर दिसि वोटर आईडी, पैन आ आधार कार्ड वाला एहि लोककेँ अपन राज्यमे रोजी-रोटीक अधिकारसँ वंचित कय रहल छी।
केंद्र पर राज्यक बकाया बजट रोकबाक आरोप लगबैत मुख्यमंत्री कहलनि जे भाजपाक सौतेली मातृ व्यवहारक बावजूद राज्यक तहत 69 हजार किलोमीटर सड़कक निर्माण कयल गेल, 11 हजार करोड़क आवास योजना शुरू कयल गेल अछि। सड़क आ ग्रामीण आवास परियोजनाक रैंकिंगमे बंगाल लगातार पांच बेर शीर्ष पर रहल अछि।
सीएम कहलनि जे आर्थिक संकटक बाद सेहो राज्यमे लोकक औसतन 50 दिनक रोजगार भेटि रहल अछि आ हुनक सरकार विभिन्न योजनाक तहत डेढ़ करोड़ मैन-डे केर सृजन कयलक अछि। एक दिसि भाजपा बंगालक गरीब जनताकेँ वंचित कय रहल अछि आ दोसर दिसि अहाँक राज्यमे विभिन्न दुर्घटनामे मौतक सिलसिला जारी अछि।
ओ कहलनि, हुनकर सरकार समाज कल्याण पर सुप्रीम कोर्ट आ हाईकोर्टक निर्देशक अनुसार अनुसूचित जाति (26 प्रतिशत), अनुसूचित जनजाति (6 प्रतिशत), पिछड़ा वर्ग आ मुसलमान (30 प्रतिशत) केर हितक रक्षाक लेल काज कय रहल अछि। हमर सभक रास्ता कियो नहि रोकि सकैत अछि। हमर सपनाकेँ साकार करबासँ कियो नहि रोकि सकैत अछि।
भाजपा विधायक वॉक आउट
प्रश्न घड़ीमे शिक्षा क्षेत्रमे संकट पर स्थगन प्रस्ताव देलनि। जकरा विधानसभा अध्यक्ष बिमन बनर्जी खारिज कय देलनि। भाजपा विधायक एहि पर भारी हंगामा मचा देलनि। हंगामाक दौरान सभापति भाजपा विधायक मनोज ओरावनकेँ अनुशासनक उल्लंघनक आरोपमे निलंबित कय देलनि। संगहि भाजपाक मुख्य सचेतक शंकर घोषकेँ सेहो चेतौनी देलनि। एकर बाद भाजपाक सबटा 40 विधायक प्रतीकात्मक विरोधक रूपमे तुलसीक पौधा लऽ सदनसँ बाहर निकलि गेलथि।
एहि पर सीएम ममता बनर्जी कहलनि, भाजपा नेता मात्र गारि-गरौबलि केर प्रयोग करय चाहैत छथि आ निराधार आरोप लगाबय चाहैत छथि। की आब ओ सभ निर्णय लेत जे की पहिरब, की खाएब वा कोन जूता पहिरब ? की ओ सभ डिक्टेट करत ? पूर्व सांसद केर रूपमे हमरा जे डेढ़ लाख टकाक पेंशन आवंटित कएल गेल अछि ओ हम स्वीकार नहि करैत छी। की ओ सभ हमरा नैतिकता आ ईमानदारी सिखाओत ?
ममता बनर्जी बजलीह, हमर बात पर ध्यान दियौ, अगिला विधानसभा चुनावमे भाजपा शून्य भऽ जायत। लोक अहाँक राजनीतिकेँ ठुकरा देलक अछि। भाजपा अध्यक्ष सुकांत मजुमदारकेँ निशाना बना कए ममता बनर्जी कहलनि, एकटा आधा केंद्रीय मंत्री छथि जे चप्पलसँ प्रेम करैत छथि। चप्पलक दोकान कियैक नहि खोलैत छथि ?
