महाकुंभक पहिल अमृत स्नानक अवसर पर करोड़ोक संख्यामे श्रद्धालु देश – विदेशसँ महाकुंभ नगर प्रयागराज पहुँचल छलथि। प्राप्त जानकारीके अनुसार लगभग तीन करोड़ श्रद्धालु, पहिल अमृत स्नानक पावन अवसर पर त्रिवेणी संगममे डुबकी लगौलनि। मैथिल युवक दीपक कुमार मैथिल, जे अप्पन परिवारक संग तीर्थक्षेत्र प्रयागराजमे उपस्थित छलथि, ओ बेरुपहर लगभग एक बजे मेला क्षेत्रमे दिगम्बर अखाड़ाक सेक्टर 21 मे रामचंद्र परमहंस दिगंबर अखाड़ा कैम्पमे भक्त आ श्रद्धालु लोकनिकेँ भोजन करा, महावीर मार्गसँ त्रिवेणी संगम स्नान क’ घुरैत संतक काफिला देखि रहल छलाह।
अचानकसँ आसपास अफरा-तफरीक माहौल बनि गेल, लोक एम्हर – ओम्हर भागि रहल छल, चीख – पुकार सेहो मचल। दीपक अप्पन मष्तिष्कके नियंत्रित कऽ मामिला बुझबाक ध्येयसँ नजदीक पहुँचलाह। दीपक देखलनि कि, सड़कके कातमे एकटा चहक ठेला पर गैस सिलेंडरक रेगुलेटर लूज छलैक, फलस्वरूप प्रेशरसँ गैसक रिसाव भीड़क तरफ भऽ रहल छलैक। दोकानदार आ ओकर बच्चा चिचियाइते दोकान छोड़ि पड़ा गेल, उपस्थित हर व्यक्ति जान बचा, भागि रहल छल। लगभग हर व्यक्ति किछु करयमे स्वयंकेँ असमर्थ मानि लेने छल। महाकुंभ आ मेला क्षेत्रमे एहि तरहक घटना कखनहु भयावह रूपमें परिवर्तित भऽ सकैत अछि, इएह सोचि – विचारि दीपक मैथिल, अप्पन जानक परवाह नहि करैत अत्यंत सूझबूझ आ सतर्कताक संग ओहि ठेला परसँ गैस सिलेंडर उतारि ओकर रेगुलेटर बंद कएलनि, पुनः ओकर ढक्कन बंद कएलनि। तदुपरांत ओहि सिलेंडरके गड्ढामे गारि ऊपरसँ माटि आ बोरा धएलनि। दूसँ तीन मिनटक भीतर ई सभटा उपक्रम भेल तदुपरांत सड़क पर स्थिति सामान्य भेला पर लोकक आवाजाही पुनः, शुरू भेल।
एहि क्रममे कुंभ मेला हेल्पलाइन आ 112 पर फोन कऽ सुचना सेहो देल गेल किछुए क्षण पश्चात् पुलिस आ फायर ब्रिगेडक दू गोट गाड़ी, मेला क्षेत्रक भीड़केँ चिरैत पहुंचल। प्रशासनिक अधिकारी लोकनि, हर तरहक निरिक्षण करैत दिशा निर्देश जारी कएलनि। उपस्थित लोक आ दरोगा (खाक चौक) संगहि तमाम फायर अधिकारी लोकनि, एहि मैथिल युवक दीपक कुमार मैथिलक सूझबूझ आ बहादुरीक मुक्त कंठसँ प्रसंशा कएलनि।
मैथिल पुनर्जागरण प्रकाश, दीपक मैथिलकेँ, हुनक बहादुरी आ सूझबूझसँ कएल गेल एहि कार्य लेल साधुवाद दैत गौरवान्वित अनुभव कऽ रहल अछि।
