मधुबनी जिलामे केंद्रीय विद्यालय केर स्थापनाके लेल जिला प्रशासन महत्वपूर्ण पहल कयलक अछि। एहिसँ पहिने मधुबनी सदर अनुमंडलकेँ लेल केंद्रीय विद्यालय खोलय केर प्रस्ताव राज्य सरकारक माध्यमसँ केंद्रकेँ भेजल गेल अछि। आब जिला केर विशाल क्षेत्र, अधिक जनसंख्या घनत्व आ शैक्षणिक जरूरत केर ध्यानमे राखैत झंझारपुर अनुमंडलक लेल अलगसँ एकटा नव प्रस्ताव तैयार कs शिक्षा विभाग बिहार सरकारकेँ पठा देलक अछि।
जिलाधिकारी आनंद शर्मा स्पष्ट कयलनि कि ई दूनू प्रस्ताव एक-दोसर केर विकल्प नहि अछि, बल्कि जिला केर अलग-अलग शैक्षणिक जरूरतक आधार पर भेजल जाय वाला स्वतंत्र प्रस्ताव अछि। ओ कहलनि जे, मधुबनी अनुमंडल लेल पहिने पठाओल गेल प्रस्ताव ओहिना अछि आ राज्य आ केंद्र सरकार द्वारा जिला लेल मात्र एकटा विद्यालयक मंजूरी भेटल तs मधुबनी अनुमंडलक प्रस्ताव केर प्राथमिकता देल जायत। झंझारपुर अनुमंडल केर लेल भेजल गेल नव प्रस्ताव जिला केर अतिरिक्त शैक्षणिक जरूरतकेँ ध्यानमे राखि तैयार कएल गेल अछि. प्रशासन इहो स्पष्ट कयलक अछि जे एहि दुनू प्रस्तावके लsकs जनतामे कोनो तरहक भ्रम नहि हेबाक चाही। इ एकटा निरंतर प्रक्रिया अछि, जकरा सर्वेक्षण, जनसंख्या केर आंकड़ाके विश्लेषण आ शैक्षिक जरूरतक केर आधार पर संबंधित विभागकक द्वारा निर्णय लेल जायत।
झंझारपुरक लेल भेजल गेल प्रस्ताव जिलाक बढ़ैत शैक्षणिक जरूरतकेँ पूरा करय केर एकटा अतिरिक्त प्रयास अछि, जखनि कि मधुबनीक प्रस्तावकेँ प्रशासनिक प्राथमिकता देल जा रहल अछि। अतः एहि समस्त संदर्भमे शिक्षा विभाग मधुबनी जिलाक दू अनुमंडल मधुबनी आ झंझारपुर लेल केन्द्रीय विद्यालयक स्थापनाक लेल बिहार सरकारक शिक्षा विभागक माध्यमसँ केंद्र सरकारकेँ प्रस्ताव पठाओल गेल अछि, जाहिसँ जिलाक बच्चा सभकेँ गुणवत्तापूर्ण आ सुलभ शिक्षाक अवसर भेटि सकय।
