मिथिला क्षेत्रीय बिहारक समस्तीपुर जिलामे दरभंगासँ अमृतसर जा रहल जननायक एक्सप्रेसकेँ उपद्रवी लोकनि लूटपाट कयलक अछि। एहि दौरान उपद्रवीसभ एकटा यात्रीकेँ गोली मारि देलक जखन ओ विरोध कयलनि। कहल जाइत अछि जे डकैतीक क्रममे उपद्रवीसभ कतेको यात्रीकेँ मारि-पीट सेहो कयलक।
यात्रीसभसँ मोबाइल आ पाइ सेहो लूटल गेल।
जानकारीक अनुसार ई घटना बुधदिन देर राति सोनपुर रेलवे डिवीजनक कर्पूरीग्राम स्टेशन पर भेल, जखन १५२११ जननायक एक्सप्रेस ट्रेन दरभंगा सँ अमृतसर जा रहल छल, तखन कर्पूरी गाम रेलवे स्टेशन पर सशस्त्र अपराधी लूटपाट शुरू कऽ देलक। एहि दौरान अपराधीसभ एकटा यात्रीकेँ गोली मारि घायल कऽ देलक। अपराधीसभ यात्रीसभसँ मोबाइल आ पाइ सेहो लूटि लेलक। ट्रेनमे सवार भऽ उपद्रवी सभ २ सँ ३ के संख्यामे ई घटना कयलक। सबहक हाथमे पिस्तौल छल। घायल यात्रीक पहिचान हरिनगरक निवासी मिट्ठू कुमारक रूपमे भेल अछि। ओ दरभंगासँ अमृतसर जा रहल छलाह।
घटनाक सूचना भेटलाक बादो आरपीएफ, जीआरपी आ स्थानीय पुलिस बहुत काल धरि नहिं पहुँचलाक कारण आक्रोशित रेल यात्री सेहो स्टेशन पर हंगामा कऽ देलक। एहि दौरान ट्रेन कर्पूरीग्राम स्टेशन पर लगभग डेढ़ घंटा धरि ठाढ़ छल। बादमे स्टेशन पर रेलवेक वरिष्ठ अधिकारीक आगमनक बाद घायल यात्रीकेँ समस्तीपुर रेलवे अस्पताल पठाओल गेल आ सुरक्षा स्वीकृतिक बाद ट्रेन निकलबामे सफल रहल। अतिरिक्त पुलिस अधीक्षक कहलनि जे रेलवे पुलिस, रेलवे सुरक्षा बल आ स्थानीय पुलिस अपराधीसभकेँ गिरफ्तार करबाक लेल संयुक्त रूपसँ सम्भावित स्थानपर छापा मारि रहल अछि।
