कर्नाटकक राजनीतिमे हलचल मचल अछि। पूर्व प्रधानमंत्री एचडी देवगौड़ाक पोता प्रज्वल रेवन्ना, जे कतेको महिलाक यौन उत्पीड़नक आरोपक सामना कऽ रहल छथि, संकटमे छथि। आब हुनकर गिरफ्तारीक लेल लुकआउट सर्कुलर जारी कयल गेल अछि। ई जानकारी स्वयं गृहमंत्री जी परमेश्वर बृहस्पति कऽ देलनि।
प्रज्वल एहि मामिलाक जाँच करैवला विशेष जाँच दल (एसआईटी)क समक्ष उपस्थित होयबाक लेल सात दिनक समय माँगने छथि। एहि पर परमेश्वर कहलनि जे २४ घंटासँ बेसी देबाक कोनो प्रावधान नहिं अछि। “जहिना पता चलल जे प्रज्वल रेवन्ना विदेश चलि गेल छथि, लुकआउट नोटिस जारी कयल गेल। हम सभ बंदरगाह आ हवाई अड्डा केर लुकआउट नोटिसक बारेमे सूचित कऽ देने छी।”
३३ वर्षीय प्रज्वल रेवन्ना पूर्व प्रधानमंत्री आ जेडीएस सुप्रीमो एचडी देवगौड़ाक पौत्र आ विधायक आ पूर्व मंत्री एचडी रेवन्नाक बेटा अछि। कतेको महिला संग ओकरा पर यौन उत्पीड़नक आरोप लगाओल गेल अछि आ कतेको एकर विडियो वायरल सेहो भेल अछि।
राज्य सरकार एहि मामिलामे एसआईटीक गठन कयलक अछि। प्रज्वल कर्नाटकक हासन लोकसभा सीटसँ चुनाव लड़ि रहल अछि, जतय २६ अप्रैलकेँ मतदान भेल छल। पुलिस सूत्रक अनुसार, जहिना सांसदसँ जुड़ल वीडियो सामने आबय लागल, मतदान समाप्त भेलाक बाद ओ देश छोड़ि भागि गेल।
गृहमंत्री जी परमेश्वर कहलनि “हमर एसआईटी सदस्य आरोपीकेँ समय देल जाय वा नहिं, एहि पर कानूनी राय लऽ रहल छथि। एसआईटी हुनका गिरफ्तार करबाक लेल तैयार अछि किएक तँ २४ घंटासँ बेसी देबाक कोनो प्रावधान नहिं अछि।
एकटा आर महिला प्रज्वल आ ओकर पितापर यौन उत्पीड़नक आरोप लगबैत पुलिसमे शिकायत दर्ज करौलक अछि। एहि पर मंत्री कहलनि कि एकटा आओर पीड़ित आगू आबि गेल अछि। ओ शिकायत दर्ज कएने छथि। पीड़ितक बयान दर्ज कएल गेल अछि। ओ आगू कहलनि जे एकटा आओर महिला शिकायत दर्ज कयने छथि, जकर विवरण एखन साझा नहिं कयल जा सकैत अछि।
पूर्व केन्द्रीय मंत्री आ कांग्रेस नेता डॉ. वीरप्पा मोइली कहलनि, “एकटा राजनेताक रूपमे हम लज्जित छी। ओ सबसँ पैघ सजाक हकदार अछि। नारा अछि ‘बेटी बचाओ बेटी पढ़ाओ’, हमरा लगैत अछि जे पीएम मोदीकेँ अपन माथ लज्जासंँ झुका लेबाक चाही।”
