पछिला दू सप्ताहमे भाजपाक वरिष्ठ नेता आ पूर्व उप प्रधानमंत्री लालकृष्ण आडवाणीकेँ दू बेर अस्पतालमे भर्ती कयल गेल अछि। ९६ वर्षीय आडवाणी बहुत समयसँ स्वास्थ्यक समस्यासँ पीड़ित छथि। आब हुनकर स्वास्थ्य स्थिर अछि। हालहिमे एम्समे हुनकर ऑपरेशन सेहो भेल छल।
भाजपाक वरिष्ठ नेता आ पूर्व उप प्रधानमंत्री लालकृष्ण आडवाणीक स्वास्थ्य स्थिर अछि। अस्पतालसँ छुट्टी भेटलाक बाद लालकृष्ण आडवाणी अपन निवास पर ठीक भऽ रहल छथि। लालकृष्ण आडवाणीकेँ बुधदिन राति ९ बजे दिल्लीक अपोलो अस्पतालमे भर्ती कयल गेल छल। इलाजक बाद अस्पताल स्वास्थ्य बुलेटिन जारी कयलक आ कहलक जे हुनकर स्वास्थ्य स्थिर अछि। जकर बाद बृहस्पति दिन हुनका अस्पतालसँ छुट्टी दऽ देल गेलनि।
एहिसँ पहिने २६ जूनकेँ लालकृष्ण आडवाणीकेँ दिल्लीक एम्समे भर्ती कयल गेल छल। हुनका तंत्रिका विज्ञान (न्यूरोलॉजी) विभागक देखरेखमे राखल गेल छल। एहि दौरान हुनकर ऑपरेशन सेहो भेलनि। शल्य चिकित्साक बाद लालकृष्ण आडवाणीकेँ अस्पतालसँ छुट्टी दऽ देल गेलनि।
अस्वस्थताक कारण ओ आइ-काल्हि अपन घरमे रहैत छथि आ कोनो सार्वजनिक कार्यक्रममे भाग नहिं लैत छथि। आडवाणीकेँ एहि साल देशक सर्वोच्च सम्मान भारत रत्नसँ सेहो सम्मानित कयल गेल छल। मुदा स्वास्थ्यक कारण ओ राष्ट्रपति भवनक कार्यक्रम धरि नहिं पहुँचि सकलाह।
राष्ट्रपति द्रौपदी मुर्मू ३० मार्चकेँ भारत रत्न देबाक लेल हुनक निवास गेल छलीह किएक तँ ओ समारोहमे शामिल नहिं भेल छलथि। प्रधानमंत्री नरेन्द्र मोदी, उपराष्ट्रपति जगदीप धनखड़, केन्द्रीय गृह मंत्री अमित शाह आ केन्द्रीय रक्षा मंत्री राजनाथ सिंह सेहो हुनक निवास पर उपस्थित छलाह।
पूर्व उप प्रधानमंत्री लालकृष्ण आडवाणीकेँ पहिने वर्ष २०१५ मे पद्म विभूषण पुरस्कारसँ सम्मानित कयल गेल छल। ओ पूर्व प्रधानमन्त्री अटल बिहारी वाजपेयीक नेतृत्वमे २००२ सँ २००४ धरि भारतक उप प्रधानमन्त्रीक रूपमे काज कयलनि। लालकृष्ण आडवाणी देशक गृह मंत्री सेहो रहि चुकल छथि। ९० केर दशकक अयोध्या राम मंदिर आंदोलनक ओ अग्रगणी नेता रहल छथि। ओ रथयात्रा कय जन-जन तक राम मंदिरक संदेश पहुंचेलनि।
