बिहार लोक सेवा आयोग द्वारा आयोजित ७०म पीटी परीक्षा फेरसँ आयोजित करबाक माँग करैत पटनामे मंगल दिन विरोध प्रदर्शन जारी रहल।
बीपीएससीक अभ्यर्थी गर्दानीबाग आ मुसल्लाहपुर हॉलमे विरोध प्रदर्शन कयलनि। सोमदिन जकाँ मंगलदिन पटनामे छात्र आ शिक्षक सड़क पर उतरि गेलाह। गरदानीबाग विरोध स्थल पर सेहो बहुत रास उम्मीदवार प्रदर्शन कऽ रहल छथि। शिक्षकसभमे खान सर सहित कतेको लोक सम्मिलित छथि। ओ सभ छात्रक प्रदर्शनकेँ अपन समर्थन दऽ रहल छथि। सब कियो बीपीएससी आ नीतीश सरकारक खिलाफ नाराबाजी कऽ रहल अछि। हुनकर मांग अछि जे बिहार लोक सेवा आयोग ७०म पीटी परीक्षा जल्दीसँ जल्दी रद्द कऽ फेर परीक्षा होय।
एम्हर संवाददाता सभसँ बातचीत करैत खान सर कहलनि जे ई बीपीएससी आन्दोलन २.० अछि। पछिला आन्दोलनमे बहुत रास राजनेता प्रवेश कयने छलाह। एहि कारणेँ नीतीश सरकारकेँ लगलनि जे छात्र गंभीर नहि छथि। मुदा आब हम एहि आन्दोलनक नाम 2.0 रखलहुं। उम्मीदवार सभ इहो कहलनि जे इ हमर आंदोलन अछि। हम अपन बल पर लड़ब। एहिमे कोनो नेताक प्रवेश नहि होएत। खान सर स्पष्ट कयने छथि जे हम कोनो नेताक प्रवेश नहि देब।
खान आगू कहलनि जे हम फेरसँ परीक्षा अवश्य आयोजित करबायब। हमर आंदोलन जारी रहत। परीक्षा रद्द करबाक लेल हमरा लग पर्याप्त सबूत अछि। हम एकरा कोर्टमे पेश करब आ हम जीतब। सरकारकेँ छात्रक भविष्यकेँ ध्यानमे राखि बीपीएससी ७०म पीटी परीक्षा रद्द करबाक चाही।
