बिहारक पूर्व मुख्यमंत्री आ राष्ट्रीय जनता दल (राजद) नेता राबड़ी देवी मंगलकेँ पटनामे जमीनक बदला नौकरीक लेल मनी लॉन्ड्रिंग मामिलामे पूछताछ लेल प्रवर्तन निदेशालयक कार्यालय पहुँचलीह। आधिकारिक सूत्र कहलक जे ईडी राजद अध्यक्ष आ बिहारक पूर्व मुख्यमंत्री लालू प्रसाद, हुनकर पत्नी राबड़ी देवी आ बेटा तेज प्रताप यादवके एहि मामिलामे पूछताछक लेल तलब कयल गेल छलथि।
नौकरीक लेल जमीन घोटाला मामिलामे ईडीक टीम मंगलकेँ पटनाक ईडी कार्यालयमे पूर्व मुख्यमंत्री राबड़ी देवीसँ पूछताछ कयलक। राबड़ी देवीक अतिरिक्त हुनकर बेटा आ पूर्व मंत्री तेज प्रतापसँ सेहो पूछताछ कयल गेल। ईडी लग प्रश्नक एकटा पैघ सूची छल। पूर्व मुख्यमंत्री आ हुनकर जेठ बेटासँ ४ घंटा धरि पूछताछ कयल गेल। ईडी राबड़ी देवीसँ कतेको प्रश्न पूछलक, जाहिमे सँ ७ टा काफी महत्वपूर्ण छल।
सूत्रक अनुसार, ईडी सबसँ पहिने राबड़ी देवीसँ पूछलक जे तेजस्वी यादव दिल्लीक न्यू फ्रेंड्स कॉलोनीमे बंगला कोना प्राप्त कयलनि ? ईडी पुछलक जे सगुना मोड़ अपार्टमेंटक जमीन कोना कीनल गेल ? ओकर निर्माणक लेल पैसा कतयसँ आयल आ निर्माण कखनि शुरू भेल ? ईडी राबड़ी देवीसँ पूछलक जे अहाँक नाम पर जमीन कोना अधिग्रहित कयल गेल ? अहाँ ओहि लोककेँ केना जनैत छी जिनकासँ नौकरीक बदला जमीन लेल गेल छल आ अहां ओहि लोकसँ पहिल बेर कहिया भेंट केलहुं ? अहां हुनका सबके नौकरी देबाक पैरवी किएक केलहुं ?
एहि सभ प्रश्नक बाद ईडी राबड़ी देवीसँ पुछलक जे की ओ दुपहरियाक भोजन करतीह। पूर्व मुख्यमंत्री जवाब देलनि,’हँ’। ईडीक अधिकारी सभ कहलनि ठिक, भोजन करू। जँ अहांकेँ कोनो दबाई लेबाक जरूरत अछि तँ अहाँ ओ सेहो लए सकैत छी।
पूछताछक दौरान टीम राबड़ी देवीसँ चाह आ पानिकेँ बारेमे सेहो पूछलक। राबड़ी देवी आ तेज प्रतापकेँ लंच ब्रेक भेटल। सांसद मीसा भारती अपन माता राबड़ी देवी आ भाय तेज प्रताप यादवक लेल दुपहरक भोजन लऽ कऽ ईडी कार्यालय पहुँचल छलीह।
मीसा राबड़ी देवीक लेल दबाई सेहो लऽ अनलीह। मीसा भारती राबड़ी देवीकेँ दुपहरियाक भोजन देलनि आ तखनि राबड़ी देवीसँ एक बेर पुनः पूछताछ कयल गेल आ तकर बाद फेर छोड़ि देल गेल। काल्हि केर पूछताछ प्रक्रिया पूरा भऽ गेल आ ओ बाहर आबि गेलथि। तेज प्रताप यादव साँझ धरि ईडी कार्यालयक भीतर उपस्थित छलथि आ पूछताछ कएल जा रहल छल।