भाजपा प्रदेश अध्यक्ष आ उपमुख्यमंत्री सम्राट चौधरी लालू यादव आ हुनकर कथित गुंडासभ पर जोरदार हमला कयलनि अछि। ओ कहलनि कि चुनावक बाद सभ पर कारवाई कएल जाएत। ओ सभ भागत नेपाल।
पटनाक अनुमंडल मुख्यालयसँ ८ किलोमीटर दूर चंढ़ोस हाई स्कूल खेल मैदानमे बृहस्पति (२३ मई) केँ एनडीए उम्मीदवार रामकृपाल यादवक समर्थनमे एकटा चुनावी सभा भेल। सभाकेँ सम्बोधित करैत भाजपा प्रदेश अध्यक्ष आ उपमुख्यमंत्री सम्राट चौधरी लालू यादव आ राजद पर जमिकय निशाना साधलनि। ओ कहलनि जे चुनावक बाद राजदक गुण्डा सभक खिलाफ कारवाई कएल जाएत।
भाजपा प्रदेश अध्यक्ष सम्राट चौधरी कहलनि जे लालू यादवक गुण्डा सभकें जेलमे बंद कयल जायत। चुनाव खतम होइते हम हुनका सभकेँ फुलवारी जेलमे बन्द करब, अथवा ई लोकसभ नेपाल भागत। लालू यादव माफिया लोकसँ घिरल छथि। जतेक हिनकर बालु माफिया आ शराब माफिया अछि, सभक सूची बनि रहल अछि। चुनाव खतम होइते एहि पर कारवाई होएत। ओ जनतासँ कहलनि जे चिंता नहिं करू। संगहि ओ दस सालमे एनडीए सरकारमे कयल गेल काज सभकेँ सेहो गिनेलनि।
एहि अवसर पर उपस्थित पूर्व मुख्यमंत्री जीतन राम मांझी कहलनि जे लालटेन युगसँ आब हम सब बिजलीक युगमे आबि गेल छी। लालटेनक युगकेँ याद करैत लोक सहमि जाइत अछि। एनडीएमे शामिल नेता सभ साफ-सुथरा छथि। ओ कहलनि जे नरेन्द्र मोदीकेँ हटाबय लेल देशक सभ भ्रष्ट एक संग आबि गेल अछि, मुदा ई नहिं होबयवला अछि।
बतबैत चली जे सारणमे पांचम चरणक मतदानक बाद खूब हिंसा भड़कि उठल छल। भाजपाक आरोप अछि जे चुनावक दिन आ बादमे राजदक गुंडासभ माहौल बिगाड़लक, हमला कयलक आ फेर दोसर दिन गोली चला कए माहौल खराब कयलक। एहि मामिलाक संबंधमे भाजपाक प्रदेश अध्यक्ष आरजेडी केर गुंडखसभक खिलाफ कारवाई करय केर बात कहलनि अछि।
