लोकसभा चुनाव २०२४ केर अंतिम आ सातम चरणक मतदान १ जूनकेँ होयबाक अछि। सभ दल एहि पर अपन पूरा ताकत लगा देलक अछि। एम्हर राजद अध्यक्ष लालू प्रसाद सेहो पाटलिपुत्र लोकसभा क्षेत्रसँ राजद उम्मीदवार मीसा भारतीक पक्षमे प्रचार करय लेल मंगल दिन क्षेत्र पहुंचलाह।
राजद अध्यक्ष लालू प्रसाद यादव दावा कयलनि जे ४ जूनकेँ इंडिया गठबन्धनक सरकारक गठन होयत। नरेंद्र मोदी सरकारक सफाया भए जाएत।
पटनामे संवाददाता सभक सङ्ग चर्चाक क्रममे जखन पूछल गेल जे ४ जूनकेँ की होयत तँ ओ कहलनि, “आब मोदी गेलाह, आब ओ अपनाकेँ बता रहल छथि जे ओ अवतार छथि अवतार।”
ओ आगू कहलनि जे नरेन्द्र मोदी सरकारक सफाया होयब निश्चित अछि। संविधान बचाउ, देश बचाउ।
ओ दावा कयलनि जे इंडिया गठबन्धन सरकार बनओत। मोदी जीकेँ परिणामक दिन सब किछु पता चलि जाएत। परिणाम आबए दियौ।
लालू प्रसाद यादव पाटलिपुत्र संसदीय क्षेत्रसँ राजद उम्मीदवार मीसा भारतीक पक्षमे प्रचार करय लेल मंगल दिन फुलवारी शरीफ पहुँचल छलथि। एहिसँ पहिने लालू प्रसाद सारणसँ राजद उम्मीदवार रोहिणी आचार्यक लेल सेहो प्रचार कयने छलाह। मुदा, खराब स्वास्थ्यक कारण ओ आन उम्मीदवारक लेल प्रचार नहिं कयलनि।
एम्हर जेडीयू मीसा भारतीक हेतु प्रचार करय लेल लालू प्रसाद पर जोरदार निशाना साधलकि अछि। जदयू प्रवक्ता नीरज कुमार कहलनि, “जखनि परिवारवादक बात होइत अछि तखनि अहाँकेँ राजनीतिक मिरचाइ लागि जाइत अछि। अपन बेटी रोहिणी आचार्यक प्रचारक लेल अहाँक तबियत ठीक भऽ जाइत अछि। एहि भीषण गरमीमे आब मीसा भारती लेल सेहो प्रचार करय पहुँचि गेल छी।”
ओ कहलनि, “ई परिवार आ सम्पत्तिक मोह अछि। लालू प्रसाद कतेको दौरा करथि, भाजपा प्रत्याशी रामकृपाल यादव जीतताह।
पाटलिपुत्र संसदीय क्षेत्रमे अन्तिम चरणमे १ जूनकेँ मतदान होयत। भाजपाक रामकृपाल यादव आ राजद प्रत्याशी मीसा भारतीक बीच मुकाबला अछि।
