राष्ट्रीय जनता दल (राजद) केर अध्यक्ष आ पूर्व केंद्रीय मंत्री लालू यादवक तबियत बुधदिन अचानक बिगड़ि गेल। एकर बाद हुनका पटनाक राजा बाजार स्थित एकटा निजी अस्पतालमे आनल गेल अछि। एतय चिकित्सक हुनकर जांच कऽ रहल छथि।
जानकारी अनुसार, लालू यादवक तबियत बुधदिन भोरे बिगड़ि गेल छल। एकर बाद चिकित्सक सभ हुनक स्वास्थ्य परीक्षण कएल। चिकित्सक सभ हुनका इलाजक लेल दिल्ली लऽ जाय केर सलाह देलकनि। बताओल जा रहल अछि जे लालू यादवकेँ इलाजक लेल दिल्ली लऽ जाएबाक तैयारी भऽ रहल छल। एहि बीच अचानक हुनक तबियत फेर बिगड़ि गेल।
सूत्रक अनुसार, लालू प्रसाद यादवकेँ दिल्ली जाएबाक छल, मुदा राबड़ी आवाससँ जखनि एयरपोर्ट लेल निकललाह, तखनि हुनक ब्लड प्रेशर कम भऽ गेल आ ओ चेकअपक लेल पटनाक एकटा निजी अस्पतालमे आनल गेलाह। हुनक संग हुनक पत्नी राबड़ी देवी आ पुत्र तेजस्वी यादव सेहो उपस्थित छलथि।
लालू यादव किडनी, हृदय आ डायबिटीज जेकाँ कतेको गंभीर बीमारीसँ जुझि रहल छथि। हालहिमे हुनकर स्वास्थ्यमे सुधार भेल छल।
लालू यादवक सिंगापुरमे किडनीक ट्रांसप्लांट भऽ चुकल अछि। सिंगापुरमे रहयवाली बेटी रोहिणी आचार्य अपन किडनी हुनका दान देने छलथि। किडनी ट्रांसप्लांट होएबाक बादसँ लालू यादव विशेष सुविधा आ निगरानीमे रहैत छथि। एतय तक कि लालू यादव राजधानी संग राज्यमे जतय-जतय जाइत छथि, अपन विशेष वाहनसँ जाइत छथि। गौरतलब अछि जे लालू यादव रूटीन चेकअप लेल दिल्ली जा रहल छलथि। एहि बीच, हुनक तबीयत खराब होयबाक खबरिक बाद राजदक समर्थक चिन्तित भऽ गेल छथि। जतय अस्पतालमे लालू यादव पहुँचल छथि, ओतय कार्यकर्ताक भीड़ इकट्ठा भऽ गेल अछि। राजद समर्थक लालू यादवकेँ जल्द स्वस्थ होयबाक कामना कऽ रहल छथि। तहिना, अस्पतालक सुरक्षा सेहो बढ़ा देल गेल अछि।
