पूर्व मुख्यमंत्री जीतन राम मांझी अपन बयानक कारण आइ-काल्हि खूब चर्चामे छथि। ओतहि रवि दिन ओ लालू राजक बारेमे बड़का बयान देलनि।
केन्द्रीय मंत्री जीतन राम मांझी रविदिन कहलनि जे ‘इंडिया’ गठबंधनकेँ बिहारमे कानून-व्यवस्थाक विरुद्ध बजबाक कोनो अधिकार नहिं अछि। ई सभ थेथरलाॅजी कए रहल छथि। घटना भऽ रहल अछि, मुदा त्वरित कारवाई सेहो कयल जा रहल अछि। मुख्यमंत्री नीतीश कुमार एकटा बैसारमे सख्त निर्देश देलनि अछि। हम हुनका सभसँ पूछय चाहैत छी जे हुनका आ एहि सरकारमे की अन्तर अछि ? हमहूँ १९८० सँ विधायक छी। बिहारक लालू-राबड़ी सरकारमे अपहरण, मर्डर होइत छल, तऽ एक नंबर मार्गमे सीएम मुख्यमंत्री आवास पर अपराधी आ मृतकक परिवारकेँ बजाबैत छलाह आ कहैत छलाह ई सभ मर्डरर अछि, भूखल अछि। किछु पाइ एकरा सभकेँ दऽ दियौ, मामिला शान्त भऽ जायत आ तखनि मामिला शांत होइत छल।
ओ आगू कहलनि जे एकटा डॉक्टरक अपहरण कयल गेल छल आ हुनक बरामदगी एक अणे मार्गसँ भेल छल। ओहि समय १० सँ १२ लाख टाकाक फिरौतीक माँगल गेल छल, तखनि मामिला ५ लाखमे तय भेल। आब तऽ ओहेन बात नहिं भए रहल अछि। जँ कोनो घटना होइत अछि तखन ओहि पर कारवाई कयल जाइत अछि। बिहारक कानून व्यवस्था ओतेक खराब नहिं भेल अछि, ई बहुत हद तक ठीक अछि।
संगहि सीएम नीतीशक बारेमे देल गेल बयान पर केंद्रीय मंत्री कहलखिन कि हम नीतीश कुमारकेँ धन्यवाद देलहुं। ओहि समय नीतीश कुमार सबके सामने कहने छलाह। जीतन राम मांझी पार्टी चला रहल छथि। ई केना चलत ? हुनका लग पैसा नहिं अछि। ओ हमरा लेल नीक बात कहलखिन जे हम ईमानदार छी। ओहिसँ प्रेरणा लऽ कऽ हम लोकक बीच काज केलौं, तेँ आइ हमर पार्टी चलि रहल अछि। ओहि समय नीतीश कुमार हमरा लेल नीके कयलथि।
ओ आगू कहलनि जे जँ नीतीश कुमार हमरासभकेँ गठबंधनसँ अलग नहिं करितथि तऽ हमसभ अलग नहिं होइतौंह । हम तऽ शपथ सेहो लेने छलौंह। ओ नीतीशे कुमार छलाह जे हमरा मुख्यमंत्री बनौलनि। जे सामाजिक प्रतिष्ठा हमरा भेटल अछि ओ नीतीश कुमारक कारण अछि। हम नीतीश कुमारक खिलाफ कहियो नहिं बाजब। जे बाजैत छी तकर दोसर अर्थ लगा मिडिया खबरि चला दैत अछि।
