लालू प्रसाद यादव बिहारमे महागठबंधनक बीच सीटक बंटवाराक मुद्दाकेँ सुलझाबय लेल कांग्रेसकेँ अन्तिम ८ सीटक प्रस्ताव देलनि अछि। राजद कांग्रेससँ भागलपुर, मुजफ्फरपुर, बेतिया, सासाराम, किशनगंज, कटिहार, पटना साहिब आ समस्तीपुर केर चुनय लेल कहलनि अछि।
कांग्रेस कटिहार आ पूर्णिया सीट लेल राजद पर दबाव बना रहल छल। ओतहि पूर्व सांसद पप्पू यादव अपन पार्टी ‘जाप’ केर कांग्रेसमे विलय कऽ देने छथि। ओ पूर्णिया सीटसँ चुनाव लड़बाक मन बना लेने छथि। ओ स्पष्ट रूपसँ कहलनि अछि जे ओ कोनो दाम पर पूर्णियां सीट छोड़य लेल तैयार नहिं छथि। आब आरजेडी द्वारा कांग्रेसकेँ देल गेल आठ सीटमे पूर्णियाक नाम नहिं अछि। एहनमे सवाल इ अछि जे जँ राजद पूर्णिया सीट नहिं देत, त पप्पू यादव की करताह।
राजद गया, नवादा, औरंगाबाद, जमुई, बांका, जहानाबाद आ बक्सर सीट पर अपन उम्मीदवारक नामक घोषणा कयलक अछि। राजद गयासँ कुमार सर्वजीत, नवादासँ श्रवण कुशवाहा, औरंगाबादसँ अभय कुशवाहा आ जमुईसँ अर्चना रविदासकेँ चुनाव चिन्ह देलक अछि। तहिना तेजस्वी उजियारपुरसँ आलोक मेहता आ बक्सरसँ सुधाकर सिंहकेँ चुनाव लड़बाक तैयारी करबाक लेल कहलनि अछि। सुधाकर सिंह राजद केर बिहार अध्यक्ष जगदानंद सिंहक बेटा छथि आ जखन नीतीश आ राजद एक संग सरकार चला रहल छलाह तखन सुधाकर सिंह नीतीशक खिलाफ खुला मोर्चा खोलने छलाह, जाहि कारण हुनका मंत्री पद छोड़य पड़लनि। राजद पहिनेसँ स्पष्ट कऽ चुकल अछि जे पाटलिपुत्रसँ मीसा भारती आ सारनसँ रोहिणी आचार्य चुनाव लड़तीह।
