कांग्रेस नेता राहुल गांधी सोमकेँ बिहारक एकदिवसीय यात्रा पर छलथि। बेगूसरायमे ओ ‘पलायन रोको, नौकरी दो’ यात्रामे शामिल भेलाक बाद पटनामे एकटा कार्यक्रममे सेहो शामिल भेल छलथि। एहि दौरान भाजपा आ जदयू केर नेतागण हुनका पर तंज कसैत निशाना पर लऽ रहल छलथि।
केंद्रीय मंत्री राजीव रंजन सिंह उर्फ ललन सिंह राहुल गांधीक बिहार आबय पर कहलनि कि बिहारमे कोनो कर्फ्यू नहि लगल अछि। जे आबय चाहय से आबि सकैत छथि, किनको रोक-टोक नहि अछि। मुदा, की राहुल गांधी रोजगारक मतलब सेहो बुझैत छथि ? एकर परिभाषा सेहो जानैत छथि ? हुनका की ज्ञात अछि जे बिहारमे रोज नियुक्ति पत्र बँटा रहल अछि। एहेन लोक सभकेँ रोजगारसँ कोनो लेना-देना नहि अछि।
ओ कहलनि, बिहारमे प्रतिदिन रोजगार भेटि रहल अछि, प्रतिदिन नियुक्ति पत्र बाँटल जा रहल अछि, एहेनमे हुनका घूमय केर अछि, तऽ घूमैत रहथि। किछु बाजय केर अछि त’ सेहो बाजैथ, मुदा जनता एतय अपन मोन बना चुकल अछि। ओ राहुल गांधीक यात्राकेँ फैशनेबल यात्रा बतौलनि। हुनकर यात्रासँ कोनो असरि नहि पड़त। ओ राहुल गांधीकेँ संविधानक पुस्तक ल’ क’ घुमय पर कहलनि, हुनकर पूरा परिवारक इतिहास संविधान केर धज्जी उड़ाबय केर रहल अछि।
ओम्हर, जदयू केर कार्यकारी अध्यक्ष संजय झा कहलनि जे राहुल गांधीक दौरासँ बिहार पर कोनो असरि पड़निहार नहि अछि। ओ कहलनि जे बिहारसँ हुनका की लेना-देना अछि ? पलायन के सवाल पर राज्यसभा सांसद कहलनि जे जखनि सबसँ बेसी पलायन भेल, तखनि बिहारमे कांग्रेस आ राजदक सरकार छल। सभ चिकित्सक भागि गेल छल, छात्र भागि गेल। ओ कहलनि जे हालहिमे वक्फ पर लोकसभामे चर्चा भेल मुदा नेता प्रतिपक्ष होबय केर बावजूद किछु नहि बाजि सकलाह।
दोसर दिसि, तेजस्वी यादवक एकटा बयान पर संजय झा कहलनि जे हुनका आइ-काल्हि जदयू केर बेसी चिंता अछि, हुनका अपन पार्टी पर ध्यान देबाक चाही।
एहि बीच, भाजपाक सांसद निशिकांत दुबे कहलनि जे राहुल गांधीक पदयात्रासँ बिहारक चुनावमे कोनो फर्क नहि पड़त। बिहारमे कांग्रेसक शासन काल लगभग 58 वर्ष तक रहल। जनता पुछैत अछि जे अपने लगभग 60 वर्ष धरि बिहार पर राज कएल, अपने की केलियै ? जखनि लोककेँ कोनो उत्तर नहि भेटत त’ स्वाभाविक अछि जे ओ प्रधानमंत्री नरेंद्र मोदी आ मुख्यमंत्री नीतीश कुमारक संग होएत। राहुल गांधी पदयात्रा करथि वा भागलपुरमे बैसि जाइथ, कोन फरक पड़ैत अछि ?
