आम जनताक समस्याक समाधानक प्राथमिकता देल जायत : नीलम चौधरी
*
सहरसा समदिया
*
संभागीय कार्यालयमे सोम दिन नीलम चौधरी आयुक्त रुपमे योगदानक हेतु तत्पर भेलीह आ कोसी संभागक आयुक्तक पद सम्हारलनि। एहि अवसर पर हुनका सर्वप्रथम सर्किट हाउसमे गार्ड ऑफ ऑनर दय सम्मानित कयल गेल। एहि अवसर पर जिलाधिकारी वैभव चौधरी फूलक गुलदस्ता दऽ मान बढ़ेलनि। प्रभार ग्रहण कयलाक बाद श्रीमती चौधरी मीडियाकेँ कहलनि जे हम एखनहि तुरंत प्रभार ग्रहण कयलौंह अछि। कोसीक समस्यासँ हम परिचित नहिं छी। ओना हम किछु अफसरसँ गप कयलहुं अछि।मुदा एतय केर भौगोलिक कठिनाई आ कोसीक भयावहतासँ हम अनभिज्ञ नहिं छी। एतय केर समस्यासँ अवगत भेलाक बाद आम जनता केर समस्या सुनि कय त्वरित समाधान निकालब। ओ कहलनि जे हम तीनू जिलाक जिला पदाधिकारीक कार्यक समीक्षा कय सदैव जनहितमे काज करब। ओ कहली जे प्रशासनक प्राथमिकता हमर प्राथमिकता होएत।ओ कहली जे हम लोकक अनुकूल भऽ कए जनता लेल काज करब आ जनताक समस्या सुनलाक बाद ओकर समस्या जल्दीए समाधान भऽ जाएत। ओ कहलनि जे, जिलामे कानून व्यवस्थाक जिम्मेदारी जिला अधिकारीक अछि। तीनू जिलाक जिलाधिकारीक काजक समीक्षा कय आम जनताक समस्याक तुरंत समाधान भऽ जायत।
